«ДАР МУБОРИЗА БО ГУРӮҲҲОИ ТУНДРАВ МУТТАҲИД БОШЕМ!». Чунин омадааст дар Изҳороти Ассосиатсияи ташкилотҳои ёрирасон ба рушди туризми Тоҷикистон

ДУШАНБЕ, 06.08.2018 /АМИТ «Ховар»/. Ба АМИТ «Ховар»  мактуб – муроҷиатномаҳои  зиёде аз  муассисаву ташкилотҳои мамлакат ва берун аз он дар  робита ба амали террористии дар ҷануби Тоҷикистон рухдода, ки боиси ҳалокати сайёҳони хориҷӣ гардид, ворид  мегарданд. Изҳороти  Ассосиатсияи  ташкилотҳои ёрирасон ба рушди туризми Тоҷикистон (ТАТО)  аз ҷумлаи онҳост, ки имрӯз дастраси кормандони Агентӣ гардид.

Дар изҳороти мазкур чунин омадааст:

«Қатли бераҳмонаи сайёҳони хориҷӣ дар ҷамоати Себистони ноҳияи Данғара шоми 29 июли соли равон  аъзои Ассосиатсияи моро   сахт ба ташвиш овард. Ин ҳодисаи нангин моро бетараф гузошта  наметавонад. Мо аз ин ҳодисаи бераҳмонаву разилона  сахт ошуфтаву ғамгин гашта,  пеши меҳмонони дигар хиҷолатзадаем.

Ин ҳодисаи хунин кори онҳоест, ки ба миллат ва давлати тоҷикон   душманӣ доранд ва барои расидан ба ҳадафҳои ғаразнокашон аз ягон разилӣ рӯ намегардонанд.

Дар «Facebook»  Сафорати ИМА дар  Тоҷикистон  дар   саҳифаи худ дар робита ба ин  ҳодисаи нангин,  аз ҷумла,   нигоштааст: «Мо ин бераҳмии ҳамлагаронро шадидан маҳкум намуда, хуб дарк менамоем, ки чунин амал ба хислати азалии тоҷикон, ки  меҳмоннавозу меҳрубонанд,  ҳеҷ рабте надорад».

Ҳодиса  замоне  рух дод, ки дар Тоҷикистон   соли  рушди сайёҳӣ ва ҳунарҳои мардумӣ  эълон шудааст.  Албатта чунин амалҳои ноҷавонмардона  ҳеҷ гоҳ  ба рушди туризм дар Тоҷикистон халал  ворид намесозад. Аммо амали ношоями як нафар шаҳрванди сустиродаву  беандеша боиси марги чандин нафар сайёҳон  дар мамлакати мо    гардид, ки боиси таассуфи  зиёд  аст. Ин ҳодисаи  нанговар аз он  шаҳодат медиҳад, ки   бархе аз ҷавонони мо аз фарҳангу адабиёти миллатамон фарсахҳо дур гардида, ба доми фиреби  гурӯҳҳои ифротгаро   афтодаанд, ки  мақсадашон  ноором кардани авзои  ҷомеа аст.

Баҳри пешгирӣ намудани шомилшавии ҷавонон ба гурӯҳҳои ифротгаро ҳам оила, ҳам мактаб ва ҳам ҷомеа бояд нақши калидӣ дошта бошанд. Аз ин рӯ, ҳар яки моро зарур аст, ки дар самти мубориза бо гурӯҳҳои тундрав, ки пеш аз ҳама мехоҳанд ҷавонони моро бо ҳар ҳиллаву найранг ба доми худ кашанд, саҳмгузор бошем.

Пӯшида нест, ки ин ҳаракатҳо дар бисёр давлатҳои ҷаҳон фаъолият доранд ва чунин гурӯҳҳо ба хотири расидан ба ҳадафҳои нопокашон, бештар  ҷавононро ба ҷангҳо ҷалб мекунанд, ки аксарияти онҳо ваҳшиёна ба қатл расонида мешаванд.

Имрӯзҳо ба кулли мардумони Амрикову Швейтсария ва Ҳолланд, хоса ба пайвандони ин меҳмонони нокоми мамлакатамон  мардумони зиёд  изҳори тасаллият мекунанд.

Мо низ  ин амали нангинро шадидан маҳкум намуда, ба хешу таборони фавтидагон ҳамдардӣ баён мекунем!».