Дар Тошканд ҳамоиши доираҳои соҳибкорию тиҷоратии Тоҷикистону Ӯзбекистон доир гардид

ДУШАНБЕ, 16.08.2018. /АМИТ «Ховар»/. Дар арафаи сафари давлатии Асосгузори сулҳу Ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Ӯзбекистон  имрӯз дар шаҳри Тошканд ҳамоиши соҳибкорон ва доираҳои тиҷоратии Тоҷикистону Ӯзбекистон баргузор гардид.

Аз Кумитаи давлатии сармоягузорӣ ва идораи амволи давлатии Ҷумҳурии Тоҷикистон ба АМИТ «Ховар» иттилоъ доданд, ки дар ҳамоиш ҳамкории  мутақобилан судманди тиҷоратию иқтисодӣ ва имкониятҳои сармоягузории ҳар ду давлат дар соҳаҳои энергетика, кишоварзӣ, дорусозӣ ва сайёҳӣ баррасӣ ва муаррифӣ гардиданд.

Ҳамоишро Вазири  савдои  берунаи Ҷумҳурии Ӯзбекистон  Ҷамшед Хоҷаев ифтитоҳ намуда, ҳамзамон раиси Кумитаи давлатии сармоягузорӣ ва идораи амволи   давлатии Ҷумҳурии Тоҷикистон Фаррух Ҳамрализода доир ба имкониятҳои сармоягузорӣ дар Ҷумҳурии Тоҷикистон  сухан кард.

Фаррух Ҳамрализода зикр кард, ки  дар Ҷумҳурии Тоҷикистон шароити зарурӣ ва фазои мусоиди сармоягузорӣ барои    пешбурди фаъолияти соҳибкорӣ ва сармоягузорӣ фароҳам оварда шудааст. Барои  дастгирӣ ва рушди бахшҳои воқеии иқтисодиёт ва содагардондани қоидаҳо вобаста ба танзими фаъолияти соҳибкорӣ тадбирҳои муассир амалӣ мешаванд.

Ҳамзамон иштирокдорони ҳамоиш- доираҳои соҳибкорию тиҷоратии Тоҷикистону Ӯзбекистон  доир ба имкониятҳои воқеӣ ва захиравии таъминкунандаи рушди устувор, аз қабили захираҳои фаровони гидроэнергетикӣ ва оби тоза, захираҳои зеризаминӣ ва коркарди маҳсулоти кишоварзӣ, рушди инфрасохтори сайёҳӣ ва нақлиётӣ ибрози назар намуда, тавсеаи ҳамкории мутақобилан судмандро дар ин бахшҳои афзалиятнок мувофиқи мақсад шумориданд.

Зикр шуд, ки заминаи муносибатҳои дуҷонибаи миёни Тоҷикистон ва Ӯзбекистон аз тарафи роҳбарони давлатҳо имзо гузошташуда, он ба ҳамкории мутақобилан судманд асос меёбад ва ҳамоиши мазкур ҳамчун платформаи рушди ҳамкории минбаъдаи Тоҷикистон ва Ӯзбекистон дар самти  тақвияти  ҳамкории иқтисодӣ мусоидат хоҳад кард.

Дар ҳамоиш ҳамзамон имкониятҳои  сармоягузорӣ ва сайёҳии Ҷумҳурии Тоҷикистон тавассути  навори видеоӣ муаррифӣ гардид. Инчунин байни  соҳибкорон ва масъулини мақомоти давлатии ҳарду ҷониб нишаст дар шакли  соҳибкор бо соҳибкор (В2В) дар фазои самимият ва дӯстиву ҳамдигарфаҳмӣ сурат гирифта, аз ҷониби ширкатҳои хар ду кишвар як қатор лоиҳаҳои сармоягузорӣ ба имзо расонида шуданд.