Дар вилояти Суғд Анҷумани IV байналмилалии оҳангарон баргузор гардид

ДУШАНБЕ, 13.08.2018. /АМИТ «Ховар»/. Бахшида ба Соли рушди сайёҳӣ ва ҳунарҳои мардумӣ дирӯз дар ноҳияи Ашти вилояти Суғд Анҷумани IV байналмилалии оҳангарон баргузор гардид.

Тавре аз Хадамоти матбуоти Раиси вилояти Суғд ба АМИТ «Ховар» хабар доданд, дар Анҷумани мазкур оҳангарони шаҳру ноҳияҳои Тоҷикистон, Ӯзбекистон ва Қирғизистон иштирок намуда, оид ба таърихи оҳангарӣ ва ривоҷу равнақи ин ҳунари мардумӣ дар замони муосир ибрози андеша намуданд.

Ба иттилои манбаъ, зимни ифтитоҳи Анҷуман Раиси ноҳияи Ашт Зариф Мирдадо иштирокдоронро хайрамақдам гуфта, зикр кард, ки  маҳсули дастранҷи оҳангарони ноҳияи Ашт, аз қабили каланд, бел, теша, хоркантеша, табар, болға, дос, гулмех, наъл, корд, шамшер, оташгирак ва ғайраҳо на танҳо дар Тоҷикистон, балки дар Ӯзбекистон ва Қирғизистону Қазоқистон ҳам харидорони зиёд доранд.

Мавриди зикр аст, ки оҳангарӣ яке аз касбҳои маъмули мардуми тоҷик буда, мардуми мо ин касбро аз давраи Кова ба ёд дорад. Сабаби як андоза бардавом будани ин пеша ниёз ва талаботи мардум ба маҳсулоти оҳангарӣ мебошад.