Шумораи қурбониёни заминларза дар Индонезия ба беш аз 95 нафар расид

ДУШАНБЕ, 06.08.2018. /АМИТ «Ховар»/. Шумораи қурбониёни заминларза дар ҷазираи Ломбоки Индонезия ба 98 нафар расида, беш аз 200 тани дигар маҷрӯҳ гардидаанд. Дар ин бора ТАСС бо истинод ба намояндаи Агентии пешгирии ҳолатҳои фавқулодаи Индонезия Сутопо Нугрохо хабар медиҳад.

Ба иттилои манбаъ, дар айни ҳол таҳвили хориҷиён аз Ломбок ва дигар ҷазираҳои хурди атроф идома дорад. «Гап дар бораи 2,7 ҳазор нафар сайёҳон меравад, ки аллакай ба ҷойҳои бехавф таҳвил дода шудаанд», — гуфт С. Нугрохо.

Тибқи маълумоти Маркази зилзиласанҷӣ дар Аврупо ва Баҳри Миёназамин, рӯзи якшанбе, 5 август дар ҷазираи Ломбоки Индонезия заминларзаи шиддатнокиаш 6,6 балл рух дод, ки маркази он дар километри 49-уми шимолу шарқи шаҳри Матарам (319 ҳазор аҳолӣ) дар умқи 10 км ҷойгир буд.