«Суҳбатномаи нақлиёти шаҳрӣ ва байнишаҳрӣ» ва «Ғизонома»- туҳфаи Кумитаи забон дар Соли рушди сайёҳӣ ва ҳунарҳои мардумӣ

ДУШАНБЕ, 01.08.2018. /АМИТ «Ховар»/.  Кумитаи забон ва истилоҳоти назди Ҳукумати Ҷумҳурии Тоҷикистон ба муносибати Соли рушди сайёҳӣ ва ҳунарҳои мардумӣ «Суҳбатномаи нақлиёти шаҳрӣ ва байнишаҳрӣ» ва «Ғизонома» — ро бо се забон- тоҷикӣ, русӣ ва англисӣ таҳия кард. Дар ин бора Раиси Кумита Гавҳар  Шарофзода имрӯз, 1 август зимни нишасти хабарии ин ниҳод ба хабарнигорон иттилоъ дод.

Ба гуфтаи Г. Шарофзода,  «Суҳбатномаи нақлиёти шаҳрӣ ва байнишаҳрӣ» бо теъдоди 5 ҳазор нусха ба чоп мерасад, ки роҳнамои хубе барои шаҳрвандони Тоҷикистон, алалхусус сайёҳони хориҷӣ хоҳад буд. «Бо истифода аз китобчаи мазкур шаҳрвандон, бахусус сайёҳони хориҷӣ ба осонӣ ҷойҳои лозимаро пайдо мекунанд.  Китобчаи «Ғизонома» бошад, ба сайёҳои дар бораи хӯрокҳо ва ошхонаҳо маълумот медиҳад», илова намуд номбурда.

Масъулони Кумитаи забон мегӯянд, ҳамчунин ба ифтихори Соли рушди сайёҳӣ ва ҳунарҳои мардумӣ «Фарҳанги номҳои миллии тоҷикӣ» дар ду ҷилд таҳия ва чоп хоҳад шуд.