Дар Душанбе сеюмин Конфронси байналмилалӣ оид ба назорати ҳамаҷонибаи бемории сил дар кишварҳои Осиёи Марказӣ оғоз гардид

Сентябрь 13, 2018 15:07

ДУШАНБЕ, 13.09.2018. /АМИТ «Ховар»/.   Имрӯз  дар шаҳри Душанбе  сеюмин Конфронси байналмилалӣ оид ба назорати ҳамаҷонибаи бемории сил дар кишварҳои  Осиёи Марказӣ  оғоз ёфт.

Тавре мухбири АМИТ «Ховар» хабар медиҳад,  Конфронси мазкур  бо ташаббуси  Вазорати тандурустӣ ва ҳифзи иҷтимоии аҳолии Ҷумҳурии Тоҷикистон  ва Оҷонсии Иёлоти Муттаҳидаи Амрико (USAID)   баргузор гардида, дар он беш аз 180 нафар силшиносони баландихтисоси  ИМА, Осиёи Марказӣ ва Аврупо, сиёсатмадорон, намояндагони ташкилотҳои байналмилалӣ ва созмонҳои ҷамъиятии Ҷумҳурии Тоҷикистон, Ташкилоти Ҷаҳонии Тандурустӣ, Арманистон, Австрия,  Федератсияи Россия ва ғайраҳо   иштирок доранд.

Зимни ифтитоҳи конфронс муовини якуми Вазири тандурустӣ ва ҳифзи иҷтимоии аҳолии Ҷумҳурии Тоҷикистон Саида Умарзода зикр кард, ки «Конфронси имрӯза дар доираи тадбиқи Нақшаи миллии стратегӣ оид ба ҳимояи аҳолӣ аз бемории сил дар Ҷумҳурии Тоҷикистон барои солҳои 2015 – 2020  баргузор гардида,  он  барои ҳалли мушкилиҳои мавҷуда  дар самти фароҳам овардани шароити мусоид барои  дарёфти саривақтӣ   ва ба табобат фаро гирифтани беморон  дар доираи имконияти мавҷуда мусоидат хоҳад кард».

Инчунин С.Умарзода иброз дошт, ки бемории сил, хусусан  шаклҳои мутобиқгаштаи он  тамоми  ҷомеаи ҷаҳониро ба ташвиш овардааст. Дар Ҷумҳурии Тоҷикистон  табобати  бемориҳои шаклҳои мутобиқгашта аз    соли 2009 аз ноҳияҳои  таҷрибавӣ оғоз гардида,  соли 2014 тамоми кишвар пурра  бо  ташхис ва табобати ройгон  фаро гирифта шуд.

Бояд гуфт, ки Конфронси мазкур ду рӯз идома карда, дар он иштирокчиён оид ба  дастовард, таҷриба ва сабақҳои омӯхташуда табодули таҷриба намуда, дар сессияҳои пленарӣ ва гурӯҳҳои корӣ оид ба мавзӯъҳои вобаста ба назорати бемории сил, аз ҷумла, ташхиси пурраи бемории сил, дорувориҳои нав ва реҷаҳои кӯтоҳмуддати табобат, сили кӯдакона, назорати сироятӣ ва таҳлилгоҳҳои зиддисилӣ  иштирок менамоянд.  

Сентябрь 13, 2018 15:07

Хабарҳои дигари ин бахш

Имрӯз дар шаҳри Душанбе ҳаво то 31 дараҷа гарм мешавад
«ТОЗАГИИ СОҲИЛ». Дар сойи Тебалайи шаҳри Кӯлоб ҳашари тозагӣ гузаронида шуд
Дар Душанбе ҷаласаи IX Шурои байнидавлатии муқовимат ба коррупсия доир мегардад
Имрӯз дар ноҳияҳои водигии Тоҷикистон ҳаво то 34 дараҷа гарм мешавад
Ҳайати Тоҷикистон дар иҷлосияи 68-уми Конфронси умумии Агентии байналмилалии неруи атомӣ дар Вена иштирок дорад
Чат-боти Доно доир ба кор бо муроҷиати муштариён маълумот медиҳад
Имрӯз дар Тоҷикистон ҳаво то 28 дараҷа гарм мешавад
Дар Душанбе ҳамкории Тоҷикистон бо Созмони ҷаҳонии исломӣ оид ба масъалаҳои маориф, илм ва фарҳанг баррасӣ шуд
Донишгоҳи техникии Тоҷикистон ва Донишкадаи технологияҳои иттилоотии Чанчжоуи Чин ҳамкориро густариш медиҳанд
Сохтмони 36 манзили истиқоматӣ дар деҳаи Сурхоби ноҳияи Фархор ба андозаи 90 фоиз иҷро шудааст
СОЛИ МАЪРИФАТИ ҲУҚУҚӢ. Гурӯҳи корӣ бо сокинону фаъолони шаҳри Хоруғ вохӯрӣ анҷом дод
Имрӯз дар ноҳияҳои алоҳидаи кӯҳии Тоҷикистон борони кӯтоҳмуддат меборад