Хоруғ мизбони Форуми «Помир-инвест-2018» мешавад

ДУШАНБЕ, 12.09.2018/АМИТ «Ховар»/. 15-16 сентябри соли равон шаҳри Хоруғ — маркази маъмурии Вилояти Мухтори Кӯҳистони Бадахшон мизбони Форуми байналмилалии инвеститсионии «Помир-инвест-2018» мегардад.

Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Кумитаи рушди туризми назди Ҳукумати ҷумҳурӣ, мақомоти иҷроияи маҳаллии ҳокимияти давлатии  ВМКБ, Ассотсиатсияи соҳибкорон ва фермерон  «Милал Интер»  ва Бунёди Оғохон аз созмондиҳандагони Форуми байналмилалии «Помир –инвест-2018» маҳсуб меёбанд. Форум бо мақсади мусоидат ба  ҷалби сармоягузорони  хориҷӣ  дар густариши бахши тиҷорат, рушди сайёҳӣ ва инфрасохтори он,  ба роҳ мондани  ҳамкории иқтисодию тиҷоратӣ  байни кишварҳои минтақа,  тавсеаи татбиқи барномаи    иқтисодию иҷтимоии рушди ВМКБ ва истифодаи самараноки захираҳои мавҷудаи табиии  минтақаи Бадахшон  баргузор мегардад.

Интизор меравад, ки дар Форуми инвеститсионӣ соҳибкорону сармоягузорони ватанию хориҷӣ, роҳбарону намояндагони вазорату идораҳои Ҷумҳурии Тоҷикистон ва созмонҳои байналмилалӣ иштирок кунанд.  Дар ин росто соҳибкорони ин минтақаи баландкӯҳи Тоҷикистон имкон доранд дар Форум барномаҳои тиҷоратии худро пешкаши  иштирокдорон –сармоягузорон намоянд.

Бояд тазаккур дод, ки  минтақаи Бадахшон дорои захираҳои бои маъданҳои кӯҳӣ, чашмаҳои гарму шифобахши табобатӣ буда,  мавқеи нотакрори ҷуғрофии минтақа ба рушди  намудҳои гуногуни сайёҳии дохилӣ ва байналмилалӣ мусоидат менамояд.