ТОҶИКИСТОНРО КАСЕ, КИ СОХТ, БО ОНЕМ! Аҳли фарҳанги Тоҷикистон таъсиси «Паймони миллии Тоҷикистон»-ро маҳкум менамоянд

 ДУШАНБЕ, 13.09.2018. /АМИТ «Ховар»/. Аҳли фарҳанги Ҷумҳурии Тоҷикистон таъсиси «Паймони миллии Тоҷикистон»-ро, ки аз ҷониби неруҳои мухолифин дар Аврупо роҳандозӣ шудааст, маҳкум намуда, аз созмону ташкилотҳои байналмилалӣ, бахусус САҲА тақозои онро доранд, ки оид ба дастгирӣ ва пуштибонии ҳама гуна иқдомҳои ҳизби дар Тоҷикистон мамнуи наҳзати ислом ва созмону ҷунбишҳои мухолифини миллати тоҷик бетараф набошанд. Барои ҷаҳониён мусаллам аст, ки раиси ҳизби мамнӯъ ва террористии наҳзати исломии Тоҷикистон М. Кабирӣ ва пайравонаш тайи 27 соли истиқлолияти давлатии Тоҷикистон ба чӣ гуна зуҳуроти номатлубу нафратовар даст задаанд. Раиси ҳизбе, ки ба миллат ва Ватани хеш хиёнат кардаву бо ҳамҳамаи хоҷагони хориҷии худ ба хотири курсию мансаб ба ҳама гуна амалҳои ифротгароӣ тавъам буд, бо кадом рӯ, бо чӣ гуна масъулияте, ки олудаи кинаву адовати миллӣ ва мазҳабӣ аст, ба ном «Паймони миллии Тоҷикистон»-ро роҳбарӣ мекунад?

Мусаллам аст, ки «Паймон»-и мазкур дар қолаби ҳизби мамнӯъ ва террористии наҳзати ислом роҳандозӣ шудааст ва дар шакли нав ҳадафҳои ғаразноку ҷудоиандозиро ба муқобили миллати соҳибтамаддуни тоҷик матраҳ карданист.

Ҳамагон дарк намудаанд, ки «Паймон»-и мазкур ба вожаҳои муқаддаси миллӣ ва Тоҷикистони азиз ҳеҷ гуна рабт надорад. Чунки афроде, ки ботин ва тафаккури манқуртиашон олудаи кинаву адоват буда, ба Ватану миллат хиёнат кардаанд, ҳаққу ҳуқуқи маънавии истифодаи вожаю рамзҳои муқаддаси миллиро надоранд. Таърих исбот кардааст, ки миллати шарафманду тамаддунофари тоҷик ҳеҷ гоҳ хиёнаткорро набахшидааст ва нахоҳад бахшид:

Мо ваколатпарвари панди бузургонем,
Тоҷикистонро касе, ки сохт, бо онем.

Сарвари мо, сарвари номусу нанги мост,
Шаҳсутуни меҳри дил бо номи Ӯ барҷост.

Пайрави парвозро парвоз чун барг аст,
Дар лаби боми дигар, ҳастии мо марг аст.