Баъди сардиҳои уралӣ то охири моҳи октябр моро ҳавои муътадил интизор аст

ДУШАНБЕ, 26.10.2018. /АМИТ «Ховар»/.  То охири моҳи октябр дар ҷумҳурӣ ҳарорати ҳаво муътадил боқӣ монда,  гармии он то   ба 28 дараҷа мерасад.  Дар ин бора ба мухбири АМИТ «Ховар»   сардори Маркази обуҳавосанҷии Агентии обуҳавошиносии Кумитаи ҳифзи муҳити зисти назди  Ҳукумати  Ҷумҳурии Тоҷикистон  Ҷамила  Байдуллоева  хабар дод.

Ба гуфтаи Ҷ. Байдуллоева,  тайи чанд  рӯзи охир баъд аз сардиҳои аввали моҳ дар ҷумҳурӣ ҳавои   камабри бебориш ва боло рафтани ҳарорати ҳаво ба қайд гирифта шудааст.  Ҳарорати ҳаво дар шаҳру ноҳияҳои ҷумҳурӣ   аз 23 то ба 28 дараҷа  расида, чунин вазъи ҳаво   то охири моҳиоктябр давом мекунад.

Ба гуфтаи ҳамсуҳбат,  гарчанде ҳарорати ҳаво боло рафта бошад ҳам,  аммо рӯзҳои 28 ва 29 октябр дар як қатор минтақаҳои кӯҳӣ ва баландкӯҳ эҳтимоли тағйир ёфтани ҳаво ва боридани  боришоти на он қадар пуршиддат пешгӯӣ мешавад.  Гарчанде  дар ин рӯзҳо ҳаво тағйирёбанда бошад ҳам, ҳарорат паст намешавад.

Бояд ёдовар шуд, ки аввали моҳи октябр дар натиҷаи ҳаракат кардани ҳавои сарде, ки аз тарафи Урал ба Осиёи Марказӣ   ворид шуда буд,   дар ҷумҳурӣ ҳарорати ҳаво то 10-15 дараҷа аз меъёри муқаррарӣ  паст фаромад. Дар натиҷаи паст шудани ҳарорати ҳаво  дар як қатор минтақаҳои кӯҳии ҷумҳурӣ     борон ба барфи тар мубаддал гардид.

Бино ба иттилои Агентии обуҳавошиносӣ, барои муайян намудани вазъи ҳавои зимистони имсола мутахассисони обуҳавошиноси тоҷик баъди чанд рӯз ба шаҳри Москва сафар намуда, ҳамроҳ бо ҳамкасбони русашон вазъи ҳаворо муайян менамоянд.

Ба иттилои манбаъ, маълумоти пурра дар бораи вазъи ҳавои зимистони имсола баъди 10 ноябр манзур мегардад