Обу ҳаво: ҳафтаи оянда дар Тоҷикистон ҳаво якбора сард мешавад

ДУШАНБЕ, 06.2018./АМИТ «Ховар»/. Аз ҳафтаи оянда обу ҳаво дар қаламрави Тоҷикистон сард шуда, боришоти зиёд дар назар аст. Дар ин бора «АП» бо истинод ба Агентии обуҳавошиносии Тоҷикистон хабар додааст.

Бино ба маълумоти обуҳавошиносон, пас аз рӯзҳои истироҳат ҳарорат дар ҷумҳурӣ то 8-10 дараҷа поин меравад. Аллакай аввали ҳафтаи оянда, 8 октябр борон ва баъзан барф борида, ҳарорати ҳаво то 14 дараҷа поин меравад.

Баъди 9 октябр боришот хотима ёбад ҳам, вале рӯз то рӯз ҳарорати ҳаво паст хоҳад шуд», — омадааст дар хабари «АП».

Рӯзҳои истироҳат дар Душанбе ҳавои тағйирёбандаи абрнок дар назар буда, ҳарорат рӯзона 27 ва шабона 8 дараҷа гарм мешавад.

Дар вилояти Хатлон ду рӯз ҳаво абрноку бебориш ва ҳарорат дар водиҳо шабона 10-15 ва рӯзона 23-28 дараҷа гарм мешавад. Рӯзи якшанбе суръати вазиши шамол то ба 20-25 метр дар як сония расида, баъзан ҳаво чангу ғуборолуд мегардад.

Дар вилояти Суғд рӯзҳои истироҳат ҳавои абрнок, рӯзи якшанбе дар баъзе ноҳияҳо борони кӯтоҳмуддат борида, дар кӯҳҳо (шабона дар баландии беш аз 2000 метр) боридани барф пешбинӣ мешавад. Ҳарорат дар водиҳо шабона 8-13 ва рӯзона 21-26 дараҷа гарм, дар кӯҳҳо шабона 2-7 ва рӯзона 11-16 дараҷа гарм мешавад.

Дар Вилояти Мухтори Кӯҳистони Бадахшон низ рӯзҳои шанбе ва якшанбе баъзан борони кӯтоҳмуддат борида, дар кӯҳҳо каме барф меборад. Ҳарорат дар ғарби вилоят шабона 4-9 ва рӯзона 18-23 дараҷа гарм, дар шарқи вилоят шабона 2-7 дараҷа хунук ва рӯзона 6-11 дараҷа гарм мешавад.