«ШОДИИ ТОШКАНД». Рассомони хурдсоли Тоҷикистон ба намоиши байналмилалӣ даъват мешаванд

ДУШАНБЕ, 2.10.2018. /АМИТ «Ховар»/. Дар шаҳри Тошканди Ҷумҳурии Ӯзбекистон аз ҷониби Академияи санъати Ҷумҳурии Ӯзбекистон Намоиши VII байналмилалии тасвири кӯдакон таҳти унвони «Шодии Тошканд» баргузор мегардад. Намоиши мазкур дар ду сол як маротиба гузаронида мешавад.

Тавре аз маркази матбуоти Вазорати фарҳанги Ҷумҳурии Тоҷикистон ба мухбири АМИТ «Ховар» хабар доданд, намоиши рассомӣ моҳи декабри соли равон баргузор гардида, барои иштирок дар он  кӯдакони аз 5 то 15-сола аз кишварҳои гуногун, инчунин аз Ҷумҳурии Тоҷикистон даъват карда мешаванд.

Мавзӯъҳои мусаввараҳо соли ҷорӣ чунинанд: «Дунёи кӯдакӣ», «Ватани ман», «Ҷаҳоне, ки ман зиндагӣ мекунам», «Орзуи ман», «Ӯзбекистон аз нигоҳи ман».