«Шоми Душанбе» аз дурбини суратгири ӯзбек

ДУШАНБЕ, 25.10.2018 /АМИТ «Ховар»/. Симои Душанбеи муосир воқеан зебову диққатҷалбкунанда гардидааст. Пойтахти тоҷикон дар фурсати кӯтоҳ ба яке аз шаҳрҳои зебои на танҳо Тоҷикистон, балки минтақа табдил ёфтааст. Тарҳи зебои биноҳои Душанбе, ки дар он санъати меъмории Шарқу Ғарб омезиш ёфтааст, таваҷҷуҳи ҳар меҳмонро ба худ ҷалб мекунад.

Роҳбарони давлатҳои зиёди хориҷӣ, ки имсол зимни ҳамоишҳои сатҳи баланд ба Душанбе ташриф оварданд, зебоии пойтахти Тоҷикистонро алоҳида зикр менамуданд.

Журналистони хориҷие, ки меҳмони Душанбе буданд, ҳама мафтуни он гардида, гузоришу лавҳаҳои зиёди худро ба тасвири симои зебои Душанбе бахшиданд.

Аз ҷумла, суратгири Агентии миллии иттилоотии Ӯзбекистон Муҳаммад Амин пас аз сайругашт дар пойтахти Тоҷикистон – шаҳри Душанбе ва тамошои симои муосири он ба ваҷд омада, муҷассамаҳо, боғу гулгаштҳои зебо ва биноҳои муосири пойтахти азизамонро аксбардорӣ намудааст. Ӯ фоторепортажи худро таҳти унвони «Шоми Душанбе» дар сомонаи ин Агентӣ интишор намудааст, ки пешкаши хонандагон менамоем.