Таҳти роҳбарии Сарвазири мамлакат ҷаласаи ситоди корӣ оид ба омодагӣ ба давраи тирамоҳу зимистон доир гардид

ДУШАНБЕ, 19.10.2018 /АМИТ «Ховар»/. Имрӯз дар доираи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таҳти роҳбарии Сарвазири мамлакат Қоҳир Расулзода ҷиҳати таъмини омодагии комили соҳаҳои иқтисодиёт ва иҷтимоиёти ҷумҳурӣ ба давраи тирамоҳу зимистони солҳои 2018-2019 ҷаласаи ситоди корӣ баргузор гардид.

Дар ҷаласа масъалаҳои асосии омодагии ҳамаҷонибаи сохторҳои марбута дар доираи Қарори Ҳукумати Ҷумҳурии Тоҷикистон аз 27 марти соли 2018 «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтаззам ва самарабахш дар давраи тирамоҳу зимистони солҳои 2018-2019» мавриди таҳлилу баррасӣ қарор гирифтанд.

Таъмини сокинон бо неруи барқ, гармӣ, ангишт, маводи озуқа, таъмини ҳаракати мунтазами нақлиёт, сари вақт бартараф намудани ҳолатҳои табиии эҳтимолӣ ва дигар самтҳо мавриди таҳлилу баррасӣ қарор гирифта, масъулини марбута барои рафъ кардани мушкилоти ҷойдошта муваззаф шуданд.

Сарвазири мамлакат иброз дошт, ки масъулон ва ниҳодҳои дахлдорро зарур аст барои иҷрои бетаъхири дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мавриди бе мушкилӣ гузаронидани давраи тирамоҳу зимистони солҳои 2018-2019  тадбирҳои зарурӣ андешанд.