Дар Душанбе Ҳафтаи XII таҳсилоти Созмони ҳамкории Шанхай «Таҳсилот бидуни марз» баргузор мегардад

ДУШАНБЕ, 22.11.2018 /АМИТ «Ховар»/.   Аз 23 то 24 ноябри соли равон дар шаҳри Душанбе дар заминаи Донишгоҳи миллии Тоҷикистон Ҳафтаи XII таҳсилоти Созмони ҳамкории Шанхай «Таҳсилот  бидуни марз» баргузор мегардад.

Тавре мудири шуъбаи робитаҳои байналмилалии Донишгоҳи миллии Тоҷикистон Илҳомиддин Маҳмадиев ба мухбири АМИТ «Ховар» хабар дод,   дар кори ҳафтаи таҳсилот намояндагони ниҳодҳои давлатӣ ва донишгоҳҳои аъзои Донишгоҳи СҲШ аз Тоҷикистон, Қазоқистон, Қирғизистон, Россия, Чин, Ӯзбекистон, Покистону Ҳиндустон ширкат хоҳанд кард.

Бино ба иттилои манбаъ, дар кори Ҳафтаи таҳсилоти СҲШ намояндагони 24 донишгоҳи хориҷӣ ва 10 донишгоҳи ватанӣ иштирок менамоянд.

Инчунин дар доираи ҳафтаи мазкур   баргузории ҳамоишҳо  аз рӯи равияҳои «Минтақашиносӣ», «Экология», «Энергетика», «IT-технологияҳо», «Нанотехнологияҳо», «Педагогика» ва «Иқтисодиёт» дар назар аст.

Дар нишасти коршиносон ҷараёни татбиқ ва самтҳои тавсеаи барномаҳои таълимии магистрии муштарак таҳлил гардида, пешниҳодҳо ҷиҳати татбиқи баъдинаи Созишнома доир ба таъсис ва фаъолияти Донишгоҳи СҲШ таҳия хоҳанд шуд. Ҳамчунин зимни ҳамоиш нақшаи чорабиниҳои асосии Донишгоҳи СҲШ барои солҳои 2019-2020 тасдиқ мешавад.