Дар ноҳияи Балҷувон оид ба пешгирии сироятёбӣ аз бемориҳои ВИЧ/СПИД мулоқот доир гардид

БАЛҶУВОН,  27.11.2018  /АМИТ  «Ховар»/. Дар ноҳияи Балҷувон  дар асоси нақшаи тадбирҳои Раёсати кор бо занон ва оилаи Мақомоти иҷроияи ҳокимияти давлатии вилояти Хатлон  вохӯрии гурӯҳи кории ҳукумати вилояти Хатлон бо сокинон баргузор гардид.

Тавре ба хабарнигори АМИТ «Ховар» аз Мақомоти иҷроияи ҳокимияти давлатии вилояти Хатлон хабар доданд, зимни мулоқот  масъалаҳои пешгирии омилҳои номатлуб байни ҷавонон, аз ҷумла нашъамандӣ, сироятёбӣ аз бемориҳои ВИЧ/СПИД, пӯшидани либосҳои ба фарҳанги миллии мо бегона, баланд бардоштани масъулияти падару модар дар таълиму тарбияи фарзанд, танзими ҷашну маросим, роҳ надодан ба зиёдаравиҳо ва дигар масъалаҳо баррасӣ гардиданд.

Дар мулоқот зикр гардид, ки мутаассифона, то ҳанӯз миёни ҷавонон  амалҳои номатлуб дида мешаванд, яъне ҳоло ҳам маърифати сиёсии ҷавонони мо дар зинаи паст қарор дошта, бурдани корҳои фаҳмондадиҳӣ ба талабот ҷавобгӯ нест. Барои пешгирии ин гуна амалҳо мебояд аҳли ҷомеа дар якҷоягӣ бо мактаб ва падару модарон  кӯшиш ба харҷ диҳанд.

Зикр гардид, ки имрӯз зарур аст дар байни аҳолӣ ҳарчи бештар корҳои фаҳмондадиҳӣ гузаронида, зиракии сиёсии ҷавононро баланд бардорем, инчунин талаботи қонунҳои Ҷумҳурии Тоҷикистон дар бораи таълиму тарбияи фарзанд ва танзими анъана ва ҷашну маросимҳоро риоя намоем.

Муовини сардори Раёсати кор бо занон ва оилаи Мақомоти иҷроияи ҳокимияти давлатии вилоят Қумриниссо Сангалиева иброз дошт, ки имрӯз бемории Вируси норасоии масунияти одам ва мубталошавии сокинон ба он масъалаи рақами як маҳсуб мешавад, зеро он хеле хатарнок аст. Гуфта шуд, ки баҳри пешгирии ин беморӣ дар ҷумҳурӣ барномаҳои давлатӣ қабул гардидаанд ва кор дар ин самт идома дорад.

Масъалаи қабл аз хонадоршавӣ аз муоинаи тиббӣ гузаштани ҷавонон низ зимни мулоқот баррасӣ шуд. Даст задани ҷавонон ба нашъамандӣ масъалаи дигаре буд, ки дар ин мулоқот матраҳ гардид.

Тибқи омор, хушбахтона, дар ноҳияи Балҷувон бемориҳои сироятӣ хеле кам ба қайд гирифта шудаанд ва дар оянда бо роҳҳои фаҳмондадиҳӣ бояд пайдоиш ва паҳншавии ин бемориҳо пешгирӣ карда шавад.

Дар вохӯрӣ  аз сокинон даъват ба амал оварда шуд, ки дар пешгирии ин бемориҳои марговару хатарнок ва сари вақт ошкор намудани сироятшудагон бо мақомоти масъул ҳамкории зич ба роҳ монанд.