«ДЕҲҚОН БОШӢ…». Дар ҷумҳурӣ шудгори заминҳои кишоварзӣ бомаром идома дорад

ДУШАНБЕ, 12.12.2018 /АМИТ «Ховар»/.  Гуфтаанд: «Олим бошӣ такрор кун, деҳқон бошӣ шудгор кун». Воқеан ҳам шудгори саривақтӣ ва омода намудуни замин ба киштукори баҳорӣ аз вазифаҳои асосии кишоварзон ба ҳисоб меравад. Мувофиқи  дурнамо имсол дар ҷумҳурӣ дар майдони 607 ҳазору 830 гектар шудгори заминҳои кишоварзӣ гузаронида мешавад. Аз мусоид омадани боду ҳавои имсола кишоварзони мамлакат самаранок истифода намуда, шудгори заминҳоро вусъат бахшида истодаанд.

Тавре мутахассиси шуъбаи матбуоти Вазорати кишоварзии Ҷумҳурии Тоҷикистон Ёқубҷон Уроқов ба АМИТ «Ховар» хабар дод, то 7 декабри соли равон дар майдони 259 ҳазору 705 гектар шудгор гузаронида шудааст. Ин 43%-и иҷрои дурнаморо ташкил дода, нисбат ба ҳамин давраи соли гузашта 48 300 гектар зиёд мебошад.

Шудгори тирамоҳӣ, ки асоси камшавии касаливу ҳашароти зараррасон, захираи намӣ дар майдонҳои кишт ва омили серҳосилии заминҳо маҳсуб мешавад, дар ҷумҳурӣ бо суръат идома дорад.

Ба иттилои манбаъ, имрўзҳо шудгори заминҳо дар вилояти Суғд дар 28%, дар вилояти Хатлон 48%,  дар ВМКБ 64% ва дар ноҳияҳои тобеи ҷумҳурӣ  58% иҷро шудааст.

Ба иттилои манбаъ, барои сари вақт ва бо сифати хуб ба анҷом расонидани шудгори заминҳо 20 ҳазору  22  адад трактор сафарбар карда шудаанд, ки аз он 3430 ададаш мавриди истифода қарор доранд.