Вазорати кишоварзӣ: ҳосили ҷамъовардаи пахтакорони мамлакат 90,2 фоизи иҷрои дурнаморо ташкил медиҳад

ДУШАНБЕ, 06.12.2018 /АМИТ «Ховар»/. Имрӯзҳо дар пахтазори ҷумҳурӣ ҷамъоварии ҳосили пахта бомаром идома дошта, кишоварзон баҳри беталаф ҷамъоварӣ намудани ҳосили пахта аз тамоми воситаю имкониятҳо сари вақт ва самаранок истифода намуда истодаанд.

Ба иттилои Вазорати кишоварзии Ҷумҳурии Тоҷикистон, аз аввали мавсим то 3 декабри соли равон деҳқонони  мамлакат 323 ҳазору 680 тонна ҳосили пахта ҷамъоварӣ намуданд, ки  ин 90,2 фоизи иҷрои дурнаморо ташкил медиҳад.

Ба иттилои манбаъ, дурнамои ҷамъоварии ҳосили пахтаро то имрӯз кишоварзони ноҳияҳои тобеи ҷумҳурӣ 131,4%,  вилояти Суғд 111,5% ва вилояти Хатлон 80,2% иҷро намуданд.

Инчунин  ҳосили  ҷамъоваринамудаи пахтакорони ноҳияҳои Шаҳринав 177,5%, Ҳисор 168,7%, Ашт 144,3, Рӯдакӣ 125,9%, Зафаробод 125,3%, Данғара 117,7%, Б.Ғафуров 115,7%, Конибодом 108,9%, Бохтар 108,7%, Ҷ.Расулов 108,7%, Турсунзода 106,7%, Леваканд 105,7, Кушониён 101,0%  ва Спитамен 100,2 фоизро ташкил медиҳад.

Ёдовар мешавем, ки пахта яке аз маҳсулоти содиротии давлат ва ашёи хом барои саноати сабук ба ҳисоб рафта, бо дарназардошти талаботи бозор майдони кишти он дар ҷумҳурӣ сол аз сол васеъ ва ҳосилнокии он  низ зиёд мешавад.