Дар Чин таҳти унвони «Тоҷикистон ва Роҳи абрешим» намоиши аксҳо баргузор гардид

ДУШАНБЕ, 08.01.2019 /АМИТ «Ховар»/. 6 январи соли равон  бахшида ба 27-умин солгарди истиқрори муносибатҳои дипломатӣ миёни Ҷумҳурии Тоҷикистон ва Ҷумҳурии Мардумии Чин дар маркази музофоти Шэнси — шаҳри таърихии Сиан таҳти унвони «Тоҷикистон ва Роҳи абрешим» намоиши аксҳо доир гардид. Дар ин бора ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд.

Намоиши мазкур аз шаш бахш – робитаҳои Ҷумҳурии Тоҷикистон ва Ҷумҳурии Мардумии Чин, муносибатҳои сатҳи олӣ, ҳамкорӣ дар доираи «Камарбанд ва Роҳ», манзараҳои табиии Тоҷикистон, унсурҳо ва ҷашну маросимҳои миллӣ, иншооти меъморию фарҳангӣ, инчунин дастовардҳои Маркази омӯзиши таърихи Тоҷикистон дар Донишгоҳи омӯзгории Шэнси иборат буд.

Намоиш бо ибтикори Сафорати Тоҷикистон дар Чин ва Маркази омӯзиши таърихи Тоҷикистони Донишгоҳи омӯзгории Шэнси баргузор карда шуд.

Дар доираи иштирок дар намоиш мулоқоти Сафири Тоҷикистон  дар Чин Парвиз Давлатзода бо роҳбарияти Донишгоҳи мазкур  доир гардид.