Дар Хатлон ҷаласаи Шӯрои кор бо ҷавонон баргузор гардид

БОХТАР, 09.01.2019 /АМИТ «Ховар»/. Дар   шаҳри  Бохтар  ҷаласаи  Шӯрои кор бо  ҷавонони    назди Раиси  вилояти Хатлон  баргузор гардид.  Масъалаи асосие, ки зимни ҷаласа баррасӣ гардид, ҷамъбасти  фаъолияти кори Шӯрои мазкур буд. Дар  назди аъзои Шӯро ва даъватшудагон  раиси вилояти Хатлон Давлатшоҳ Гулмаҳмадзода  сухан гуфт.

«Маҳз иқдому дастгириҳои мунтазами Сарвари давлат, Ҳукумати мамлакат ва мақомоти иҷроияи ҳокимияти давлатӣ аст, ки имрӯз ҷавонони мо бо азму иродаи қавӣ илму дониш ва касбу ҳунар меомўзанд ва ба хотири ободиву пешрафти кишвари маҳбубамон фаъолона саъю талош менамоянд»,-иброз  намуд раиси  вилоят.

Ба зикри Давлатшоҳ Гулмаҳмадзода,  «мо бояд тамоми кӯшишу имкониятҳоямонро ба он равона созем, ки фарзандонамон дар рӯҳияи ватандӯстиву худшиносӣ, омӯхтани илму дониши муосир ва касбу ҳунарҳои замонавӣ ба камол расанд».

Ҳамзамон  раиси  вилояти Хатлон  зарур  шуморид, ки  усули корбарии тарғиботӣ, маърифатӣ ва фарҳангиамонро куллан дигар намуда, дараҷаи таъсирнокии онҳоро бояд баланд бардорем.