Маркази миллии тестӣ: соли сипаригардида 60 ҳазору 701 нафар сазовори унвони донишҷӯ гардиданд

ДУШАНБЕ, 31.01.2019. /АМИТ «Ховар»/. Соли сипаришуда наздик ба 90 ҳазор довталаб тавассути Маркази миллии тестии назди Президенти Ҷумҳурии Тоҷикистон имтиҳон супориданд. Ин нуктаро Директори Маркази миллии тестии назди Президенти Ҷумҳурии Тоҷикистон Хуршед Икромӣ имрӯз зимни нишастӣ матбуотӣ баён намуд.

Ба гуфтаи Хуршед Икромӣ, шумораи довталабоне, ки  соли 2018  ба озмуни тақсимот роҳ ёфтанд,  70 ҳазору 822 нафарро ташкил дод.

«Ин рақам ба 79,3 %-и довталабони дар имтиҳонҳо иштироккарда  баробар буда, нишондиҳандаи мазкур аз холҳои гузариши фаннии ҳар сол муқарраршаванда вобастагӣ дорад», — илова намуд мавсуф.

Саволе ба миён меояд, ки соли 2018 чанд нафар довталабон унвони донишҷӯиро соҳиб шуданд? Хуршед Икромӣ дар посух ба он чунин гуфт: «Тибқи натиҷаҳои 2 озмуни тақсимот соли сипаригардида аз шумораи умумии довталабони ба озмуни тақсимот роҳёфта ҳамагӣ 60 ҳазору 701 нафарашон сазовори номи донишҷӯ гардиданд».

Ёдовар мешавем, ки Маркази миллии тестии назди Президенти Ҷумҳурии Тоҷикистон соли 2014 таъсис ёфта, мақсади асосии он  шаффоф гузаронидани имтиҳонҳои марказонидаи дохилшавӣ мебошад.