ҶОН МАРК ПОММЕРШАЙМ САФИРИ ИЁЛОТИ МУТТАҲИДАИ АМРИКО ДАР ТОҶИКИСТОН ТАЪЙИН ШУД. Дар ин бора дар коммюникеи Сафорати ИМА дар ҶТ хабар дода шудааст

ДУШАНБЕ, 29.01.2019./АМИТ «Ховар»/. 7-уми январи соли равон  Ҷон Марк Поммершайм  Сафири фавқулода ва мухтори Иёлоти Муттаҳидаи Амрико дар Ҷумҳурии Тоҷикистон таъйин шуд. Ӯ дар ояндаи наздик ба Тоҷикистон  меояд. Дар ин бора дар коммюнике, ки Сафорати ИМА дар ҶТ дирӯз паҳн намуд, хабар дода шудааст.

Номзадии Ҷон Марк Поммершайм ба вазифаи Сафири ИМА дар Тоҷикистон аз ҷониби Президент Доналд  Трамп  12 сентябри соли 2018 пешниҳод шуда буд. Қабл аз ин ӯ ба ҳайси ҷонишини Сафири ИМА  (2015-2018) дар   Қазоқистон (шаҳри Остона) адои вазифа намудааст. Пеш аз фаъолияти корӣ дар Қазоқистон ӯ вазифаи Директори Идораи корҳо оид ба Қафқоз ва муноқишаҳои минтақавӣ дар назди Бюрои корҳои Аврупо ва Авруосиёи Департаменти давлатиро бар дӯш доштааст, ки дар чорчӯбаи он ӯ ба роҳбарии доираи густурдаи муносибатҳои Амрико бо Арманистон, Озарбойҷон ва Гурҷистон масъул буд.

Дар доираи фаъолияти дипломатии худ Поммершайм дар силсилаи вазифаҳои гуногун дар шаҳри Вашингтон, дар бахши корҳои сиёсии сафорати ИМА дар Ҷопон, Чин, Беларус ва Олмон кор кардааст. Ӯ ҳамчунин дар вазифаи Консули генералии ИМА дар шаҳри Владивостоки Руссия  кор кардааст.

Пеш аз шурӯъ ба фаъолияти дипломатии хеш Поммершайм дар шабакаи Си-Эн-Эн (шабакаи хабарии амрикоӣ) дар шаҳри Москва фаъолият намудааст. Ӯ инчунин дар омодагӣ ва гузаронидани намоишгоҳи технологияи иттилоотӣ бо Агентии иттилооти ИМА дар Гурҷистон ва Ӯзбекистон ҳамкорӣ кардааст. Поммершайм зодаи шаҳри Питтсбурги иёлати Пенсилвания буда, соҳиби дипломҳои таҳсилӣ аз донишгоҳҳои Бакнелл ва Колумбия аст. Ҳамсараш Наталия Поммершайм буда, онҳо соҳиби се писар мебошанд.

 МАЪЛУМОТИ АМИТ «ХОВАР»

Тавре аз мусоҳибаҳои қаблии ҷаноби Ҷон Марк Поммершайм бармеояд, ӯ варзишро хеле дӯст медорад, беш аз 30 сол боз велосипедронӣ мекунад. Вақтҳое буд, ки пайваста бо велосипед ба кор мерафт, ҳатто дар айёми зимистон ҳам. Ба суоли рӯзноманиголрон, ки оё чӣ тавр дар хунукии қаҳратун бо велосипед ба кор рафтан мумкин аст, чунин  посух додаст: «Ҳавои номуносиб нест, агар сарулибос муносиб бошад».

Лижасавориро низ меписандад, инчунин оббозӣ дар баҳр ва давидан дар соҳилҳои онро.

Ҷаноби Поммершайм, агар вақти холӣ даст диҳад,  машғулиятҳои зиёдеро дӯст медорад – теннис, голф. Вақте ҳанӯз хурдсол будааст, рэп гӯш мекардааст, шунидани сурудҳои гурӯҳи Opus Akoben барояш ҳаловат мебахшад.

Ба адабиёт низ рағбат дорад, Лев Толстой ва Томас Вулфро адибони дӯсдоштаи худ номидааст. Бо забон ва адабиёти Чин, Қазоқистон ва Тоҷикистон низ ошноӣ дорад.

Пухтупазро низ метавонад, худро мутахассиси тайёр кардани қаҳва мешуморад, метавонад котлетҳои лазизи амрикоӣ омода намояд.

Ҳамсараш – Наталя Поммершайм зодаи Беларус ва ҳоло шаҳрванди ИМА мебошад.