ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Дар Ёвон Маркази саломатии замонавӣ ба хизмати аҳолии деҳот шурӯъ намуд

ДУШАНБЕ 15.02.2018 /АМИТ «Ховар»/. Имрӯзҳо ба ифтихори 30-солагии Истиқлолияти давлатии Ҷумҳурии Тоҷикистон дар ҳамаи шаҳру навоҳии мамлакат корҳои ободониву бунёдкорӣ васеъ ба роҳ монда шудаанд. Дар назар аст, ки давоми се соли минбаъда дар ҳар як деҳа ва маҳалли аҳолинишин коргоҳҳои дӯзандагӣ, майдончаҳои варзишӣ, қасри фарҳанг, бунгоҳҳои тиббӣ, ҳаммом, сартарошхона, кошонаи ҳусн, пулҳо ва боғҳои фарҳангию фароғатӣ бунёд карда шаванд.

Дар робита ба ин дар Ҷамоати деҳоти Ҳасан Ҳусейнови ноҳияи Ёвон Маркази саломатии замонавии деҳоти Ширинчашма мавриди истифода қарор гирифт.

Тавре ба мухбири АМИТ «Ховар» аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд, ин Маркази саломатӣ дар доираи амалисозии лоиҳаи «Беҳтаркунии хизматрасонии тиббӣ»-и назди Вазорати тандурустӣ ва ҳифзи иҷтимоии аҳолии мамлакат бо маблағгузории Бонки ҷаҳонӣ бунёд гардид.

Бино ба иттилои Вазорат,  корҳои сохтмонӣ аз ҷониби ҶДММ «Ваҳдат» моҳи июли соли 2017 шурӯъ гардида, дар бунёди он 1 миллиону 230 ҳазор сомонӣ сарф гардидааст.  Бинои маркази саломатӣ аз 7 ҳуҷра, аз қабили утоқи момодоя, духтури тибби оилавӣ, ҳуҷраи хатна, таҳлилгоҳ, бақайдгирӣ ва  доругузаронӣ  иборат мебошад. Ҳамчунин иншооти ёрирасон, аз ҷумла нақлиёти ёрии таъҷилӣ,  печҳои махсус барои безараргардонии сӯзандоруҳо, чоҳ барои ҳолатҳои фавқулодаи сӯхтор ва манора барои таъмини оби нӯшокӣ фароҳам оварда шудаанд.

Ба иттилои манбаъ, ҳуҷраҳои корию хизматрасонӣ бо тамоми дастгоҳу таҷҳизоти муосири тиббию ғайритиббӣ, мизу курсӣ, ҷевону яхдон, шабакаи ягонаи гармидиҳӣ, дастгоҳҳои огоҳкунанда ҳангоми сар задани сӯхтор муҷаҳҳаз гардонида шудаанд.