Ҳабибулло Саъдуллозода: «Ҳадафи Лоиҳаи тиҷоратикунонии соҳаи кишоварзӣ таъмини иштироки ширкатҳои ватанӣ дар намоишгоҳҳои байналмилалист»

ДУШАНБЕ, 14.02.2019 /АМИТ «Ховар»/. Лоиҳаи тиҷоратикунонии  соҳаи кишоварзӣ аз ҳисоби маблағҳои  грантии Ассотсиатсияи байналмиллалии рушд бо мақсади дастгирӣ намудани ҳадафҳои Ҳукумати Ҷумҳурии Тоҷикистон дар самти рушд ва баланд бардоштани  сатҳи некуаҳволии аҳолӣ таҳия гардидааст. Ҳадафи Лоиҳаи мазкур   баланд бардоштани  сатҳи тиҷоратикунонии хоҷагиҳои фермерӣ, маҳсулоти агроистеҳсолӣ ва дастгирии рушди корхонаҳои микро, хурд ва миёна дар  сатҳи деҳот  тавассути васеъгардонии имконоти дастрасӣ  ба маблағгузорӣ ва мустаҳкам кардани иқтидори манфиатгирандагон мебошад.  Ин нуктаро имрӯз зимни нишасти  матбуотӣ  директори Муассисаи давлатии «Рушди соҳибкорӣ дар соҳаи кишоварзӣ» Ҳабибулло Саъдуллозода иброз дошт.

Ба гуфтаи муовини директори Муассисаи давлатии «Рушди соҳибкорӣ дар соҳаи кишоварзӣ» Ҳусейн Каримов, яке аз вазифаҳои асосии Лоиҳа- ин таъмин намудани иштироки ширкатҳои ватанӣ  дар намоишгоҳи  байналмилалӣ мебошад.

«Дар доираи  Лоиҳа дар якҷоягӣ  бо Палатаи савдо ва саноати Ҷумҳурии Тоҷикистон иштироки  ширкатҳои коркардкунандаи ватанӣ дар намоишгоҳҳои байналмилалии  «Gulfood», ки аз 18 то 22 феврали  соли 2018 дар Дубай баргузор гардида буд, таъмин карда шуд. Инчунин   Муассисаи давлатии «Рушди соҳибкорӣ дар соҳаи кишоварзӣ» дар якҷоягӣ  бо Корхонаи воҳиди давлатии «Тоҷинвест» дар  назди Кумитаи давлатии сармоягузорӣ ва идораи амволи давлатии Ҷумҳурии Тоҷикистон  иштироки ширкатҳои коркардкунандаи ватаниро дар намоишгоҳи  байналмилалии воридотӣ «ЭКСПО- 2018», ки аз 5 то 10 ноябри соли 2018 дар шаҳри Шанхайи Ҷумҳурии Мардумии Чин  баргузор гардид, таъмин намуд»,- гуфт Ҳусейн Каримов.

Ба иловаи номбурда, дар ин намоишгоҳи байналмилалӣ  ширкатҳои «Зардолу ва Компания», «Оро Исфара», «Водии меваҳо», «Дӯстӣ-2», «Исфаруд» ва Комбинати хӯроквории “Бохтар” иштирок намуда, меваҳои хушки коркарднамудаи худро ба намоиш гузоштанд. Ширкатҳои номбурда  асосан ба  содироти меваҳои хушк ва тоза  ба хориҷи мамлакат машғул мебошанд. Мақсади иштирок дар намоишгоҳи «ЭКСПО- 2018»- ин диверсификатсияи бозори содиротӣ ва  баромадан ба бозори Чин   мебошад.