Баррасии тақвияти ҳамкории бонкӣ: дар шаҳри Саняи Чин мулоқоти раиси «Амонатбонк»-и Тоҷикистон бо Дабири кулли СҲШ баргузор гардид

ДУШАНБЕ, 26.02.2019. /АМИТ «Ховар»/. Ба роҳ мондани механизми бисёрсамта дар бахши маблағгузории лоиҳаҳо, рушди қарздиҳӣ, ҷорӣ намудани ҳисоббаробаркунӣ бо асъорҳои миллии кишварҳои аъзо ва табодули таҷрибаи тарафайн яке аз принсипҳои асосии Созмони Ҳамкории Шанхай /СҲШ/  ба шумор меравад.

Ин матлаб дар мулоқоти раиси Раёсати  Бонки давлатии амонатгузории Ҷумҳурии Тоҷикистон «Амонатбонк» Сироҷиддин Икромӣ бо Дабири кулли СҲШ Владимир Норов, ки дар доираи баргузории Форуми  байнибонкии «Таҳкими ҳамкории молиявии минтақавӣ ва рушди устувори фарогир» дар шаҳри Саняи Чин доир шуд, баён гардид.

Дар ин хусус ба АМИТ «Ховар» аз Бонки  давлатии амонатгузории  Тоҷикистон «Амонатбонк» иттилоъ доданд.

Зикр шуд, ки таъмини амният ва сулҳу субот дар минтақа барои фаъолияти СҲШ яке аз самтҳои муҳими ҳамкории кишварҳои аъзои он  маҳсуб меёбад. Дар ин росто ҳамоҳангсозии самараноки давлатҳои аъзои СҲШ  ҷиҳати рушди муносибатҳои мутақобила дар доираи ин созмон чун яке аз ҳадафҳои манфиатовар дар самти густариши равобити иқтисодии байнибонкӣ нақши муҳим мебозад.

Ба иттилои манбаъ, мусоҳибон иброз намуданд, ки ҳамкории муштарак ва ба имзо расонидани созишномаҳои мухталиф яке аз ҳадафҳои асосии ҳамкорӣ дар чаҳорчӯбаи СҲШ маҳсуб ёфта, ҷонибҳо дар густариши чунин самтҳои манфиатовар тадбирҳои зарурӣ амалӣ хоҳанд кард.