Дар Тоҷикистон бунёди иншооти инфрасохтори сайёҳӣ меафзояд

ДУШАНБЕ, 11.02.2019/АМИТ «Ховар»/. Алҳол бунёди беш аз 10 иншооти инфрасохтори  сайёҳӣ дар мавзеи  Сари Хосори ноҳияи Балҷувон, воқеъ дар ҷануби Тоҷикистон  босуръат  идома дошта, баъди ба истифода супоридани онҳо сатҳу сифати хизматрасонӣ ба сайёҳони дохилию хориҷӣ дар ин  мавзеи сайёҳии Тоҷикистон  бамаротиб баланд бардошта мешавад. 

Раиси Кумитаи рушди сайёҳии назди Ҳукумати Ҷумҳурии  Тоҷикистон Нуъмон  Абдуғаффорзода мегӯяд, танҳо дар зарфи соли сипаригардида, ки Соли рушди сайёҳӣ ва ҳунарҳои мардумӣ эълон гардида буд, бо мақсади рушди инфрасохтори сайёҳӣ  дар минтақаҳои гуногуни ҷумҳурӣ беш аз 15 иншооти инфрасохтори сайёҳӣ ба истифода дода шуданд.

Аз ҷумла, дар ноҳияҳои  Кӯшониён, Шамсиддин Шоҳин, Ховалинг, Хуросон,  Нуробод,  Зафаробод,  Ёвон,  Мурғоб, шаҳрҳои Хуҷанд, Бохтар, Ваҳдат, Конибодом, Истаравшан,  Исфара ва Панҷакент меҳмонхонаҳои хурду калон бунёд гардиданд. Инчунин  сохтмони  биноҳои  иловагӣ  ва инфрасохтор дар  осоишгоҳҳои «Баҳористон», «Зумрад»,  Маҷмааи  лижаронию сайёҳии  «Сафедара» ва тармиму таҷдиди кӯли «Варзоб» идома дорад.

Ҳоло дар Тоҷикистон 170 меҳмонхона фаъолият дошта,  наздик ба 4,5 ҳазор  кормандони субъектҳои хизматрасонии туристӣ ба сайёҳон хизмат мерасонанд. Рушди инфрасохтори сайёҳӣ дар кишвар дар ҳолест, ки соли  равон Президенти Ҷумҳурии Тоҷикистон муҳтарам Эмомалӣ Раҳмон бо мақсади густариши бештари соҳаи сайёҳӣ дар Тоҷикистон се соли ояндаро солҳои рушди деҳот, сайёҳӣ ва ҳунарҳои мардумӣ эълон карданд.