ДАРАХТ БИНШОН! Дар шаҳри Бохтар корҳои ободониву ниҳолшинонӣ вусъат меёбанд

ДУШАНБЕ, 08.02.2018. /АМИТ «Ховар»/. Дар доираи омодагиҳо ба таҷлили ҷашни 30-солагии Истиқлолияти давлатии Ҷумҳурии Тоҷикистон дар шаҳри Бохтар корҳои созандагиву ободонӣ ва   сарсабзу хуррам гардонидани кӯчаву маҳаллаҳо бомаром идома доранд, менависад хабарнигори АМИТ «Ховар».

Аз ҷумла, дар Ургутмаҳаллаи шаҳр беш аз 500 бех ниҳоли мевадиҳандаву ҳамешасабз ва 400 бех гулу гулбуттаҳо, ки ба иқлими ин ҷо мутобиқанд, шинонида шудаанд. Ҳамчунин дар ин маҳалла корҳои тозакунии соҳилҳо ба масофаи 500 метр анҷом дода шуда, дар он ҷо 20 дарахти арча ва 50 дарахти сояафкан шинонида шуданд.

Дар робита ба ин раиси кумитаи Ургутмаҳаллаи шаҳри Бохтар Умедҷон Раҷабов гуфт: «Дар ин меҳнати дастаҷамъона беш аз 100 нафар сокинони Ургутмаҳалла, маҳаллаҳои Ваҳдат -1, Ваҳдат-2, Бобоҷон Ғафуров ва Ҷалолиддини Румӣ-1 иштирок намуда, саҳми худро дар ободонии шаҳр гузоштанд».

Мавриди зикр аст, ки дар доираи ин санаи муҳими таърихӣ дар Ургутмаҳалла корҳои сохтмонӣ идома доша, айни ҳол бунёди 5 иншоот, аз ҷумла мағоза, коргоҳи дӯзандагӣ, ҳавзи шиноварӣ, сартарошхона ва ошхона ҷараён дорад.