Фурудгоҳҳои байналмилалии кишвар ба зиёда аз ду миллион нафар мусофирон хизмат расонидаанд

ДУШАНБЕ, 11.02.2019/АМИТ «Ховар»/. «Аз ҷониби Комиссияи   олии тахассусии Агентии авиатсияи гражданӣ  соли сипаришуда ба 450 нафар мутахассиси соҳаи авиатсияи кишвар  шаҳодатномаҳои  тахассусӣ  дода шуда,  инчунин дараҷаи тахассусии  29 нафар  мутахассисони соҳа  баланд бардошта шуд. Ин матлабро зимни натиҷагирӣ аз фаъолияти  Агентии авиатсияи гражданӣ ва сохторҳои авиатсионии кишвар 11 феврал дар Душанбе директори Агентии авиатсияи граждании назди Ҳукумати Ҷумҳурии Тоҷикистон Икром Субҳонзода ба хабарнигорон иброз дошт.

Мавсуф афзуд, ки бо мақсади таъмини бехатарии  парвозҳо, бехатарии авиатсионӣ ва риояи санадҳои   меъёрию ҳуқуқии  соҳа аз ҷониби Агентии авиатсияи гражданӣ ва корхонаҳои  авиатсионии кишвар  соли гузашта  36 маротиба комиссия ташкил дода шуда, дар асоси хулосаҳои он  беш аз 150  шаҳодатномаҳои мутобиқати хадамотҳои марбутаи  корхонаҳои авиатсионӣ дода шуданд.

Зикр шуд, ки алҳол ба мусофироне, ки тавассути роҳҳои ҳавоӣ  аз Тоҷикистон ба кишварҳои хориҷӣ сафар мекунанд, чор фурудгоҳи байналмилалӣ –фурудгоҳҳои байналмилалии Душанбе, Хуҷанд, Кӯлоб ва  Бохтар хизмат мерасонанд.  Танҳо соли сипаригардида  фурудгоҳҳои байналмилалии Тоҷикистон ба зиёда аз ду миллион нафар мусофир  хизмат расониданд, ки аз ин омор наздик ба 70 фоизи хизматрасониҳо ба Фурудгоҳи байналмилалии Душанбе рост меояд.