ХАДАМОТИ БЕХАТАРИИ КОРҲО ДАР САНОАТ ВА СОҲАИ КӮҲКОРӢ: Дар натиҷаи ҳодисаҳои нохуш 20 нафар ҳалок шуда, 20 нафар ҷароҳати ҷисмонӣ бардоштанд

ДУШАНБЕ, 04.02.2019 /АМИТ «Ховар»/.  Соли  2018  дар корхонаву ташкилот ва  иншооти бақайдгирифташуда  31 ҳодисаи  нохуш  ва ду садамаи истеҳсолӣ ба қайд гирифта шуда, дар натиҷа 20 нафар ҳалок ва 20 нафар ҷароҳати ҷисмонӣ бардоштанд.  Ин нуктаро сардори Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати Ҷумҳурии Тоҷикистон  Санъат Раҳим имрӯз  зимни нишасти матбуотӣ иброз дошт.

Ҳамчунин дар посух ба саволи хабарнигори АМИТ «Ховар», ки дар натиҷаи  ҳодисаҳои нохуш ба оилаи зарардидагон  ва фавтидагон чӣ миқдор ҷуброни зарар пардохт карда мешавад, номбурда иброз дошт, ки  тибқи  Кодекси меҳнати Ҷумҳурии Тоҷикистон ба кормандоне, ки дар натиҷаи ҳодисаи нохуш  ҷароҳат мебардоранд,  ба андозаи на камтар аз музди миёнаи дувоздаҳмоҳаи ҷабрдида кумакпулӣ дода мешавад.  Ҳангоми   фавти корманд дар натиҷаи ҳодисаи нохуш  ба оилаи ӯ ба андозаи на камтар аз музди меҳнати шастмоҳаи фавтида кумакпулии яквақта дода мешавад.

Ба иттилои Санъат Раҳим, сабабҳои ҳодисаҳои нохуш ва садамаи истеҳсолӣ  гуногун буда, одитарини он риоя накардани техникаи бехатарӣ мебошад.