Иштироки ҳайати Ҷумҳурии Тоҷикистон дар 22-юмин Саммити иқтисодии кишварҳои Авруосиё дар шаҳри Истанбул

ДУШАНБЕ, 08.02.2019 /АМИТ “Ховар”/. Рӯзҳои 6-7 феврали соли 2019 бо ташаббуси Бунёди тадқиқоти стратегӣ ва иҷтимоии “Мармара” 22-юмин Саммити иқтисодии кишварҳои АвруОсиё дар шаҳри Истанбул баргузор гардид. Дар ин бора ба АМИТ “Ховар” аз Консулгарии генералии Ҷумҳурии Тоҷикистон дар шаҳри Истанбули Туркия иттилоъ доданд.

Дар кори саммит роҳбарони баъзе аз давлатҳои хориҷӣ, Раиси Маҷлиси Бузурги Миллии Туркия, Муовини Президенти Туркия, аъзои ҳукумати кишвари иқомат, вакилони мардумӣ, инчунин доираи соҳибкорон, сармоягузорон ва намояндагони ширкатҳои бузург аз кишварҳои Аврупо ва Осиё иштирок доштанд.

Саммит аз мизҳои мудаввар дар мавзӯъҳои иқтисод, сармоягузорӣ, обу энергетика,  илмӣ ва фановарӣ иборат буд.

Ҳайати Ҷумҳурии Тоҷикистонро дар саммит муовини Вазири рушди иқтисод ва савдо Гулрӯ Ҷабборзода муаррифӣ намуд.

Зимни суханронӣ муовини Вазири рушди иқтисод ва савдои Тоҷикистон оид ба Стратегияи миллии рушди Тоҷикистон то давраи соли 2030, имкониятҳои сармоягузорӣ дар иқтисодиёти кишвар,  лоиҳаҳои гидроэнергетикӣ, аз ҷумла оғози фаъолияти агрегати аввали Неругоҳи барқи обии “Роғун”, “CASA-1000”, минтақаҳои озоди иқтисодии кишвар ва эълон намудани мораторий ба ҳама намуди санҷишҳои фаъолияти субъектҳои соҳибкорӣ дар соҳаҳои истеҳсолӣ маълумот дод.