НИШАСТҲОИ МАТБУОТӢ: Cоли 2018 дар Тоҷикистон 131 корхона ва коргоҳҳои нав бунёд гардиданд

ДУШАНБЕ, 12.02.2019. /АМИТ «Ховар»/.  Соли 2018 дар ҷумҳурӣ 131 корхона ва коргоҳҳои нав бо 1792 ҷойҳои нави корӣ бунёд гардиданд.  Дар ин бора Вазири саноат ва технологияҳои нави Ҷумҳурии Тоҷикистон Заробиддин Файзуллозода 12 феврал зимни нишасти хабарӣ иттилоъ дод.

Ба маълумоти номбурда, дар айни ҳол дар мамлакат беш аз 2097 корхонаи саноатӣ ба қайд гирифта шудаанд. Шумораи кохонаҳои аз фаъолият бозмонда дар соли 2018-ум 127 ва дар соли 2017-ум 180 ададро ташкил дод. Сабабҳои фаъолият накардани қисме аз ин корхонаҳоро Вазири тозатаъйин дар мавсимӣ будани онҳо ва қисми боқимондаро дар набудани ашёи хом, маблағҳои гардон ва мутобиқат накардани технология арзёбӣ намуд.

Инчунин гуфта шуд, ки дар давраи ҳисоботӣ корхонаҳои саноатӣ ба хориҷи кишвар масолеҳи рангубор, маҳсулоти пенопористиролӣ, алюминияи аввалия, арматураи сохтмонӣ, семент, гипсокартон, кунҷакҳои металлӣ, сими металлӣ, хӯлаҳои алюминий, металлҳои қиматбаҳо, орд, биринҷ, равғани растанӣ, маҳсулоти қаннодӣ, ангишт, меваи хушк, консерваи меваю сабзавот, нӯшокиҳои ғайриспиртӣ, спирти этилӣ, мошинҳои кишоварзӣ, мусалласи ангур, намаки ошӣ, ҳасиб, маҳсулоти ширӣ, нахи пахта, риштаи пахтагин, матои пахтагин, маҳсулоти дӯзандагӣ, маснуоти қолинӣ, ҷӯробҳо, маснуоти кешбофӣ ва нахи абрешим содир намудаанд.