Роҳи Хоруғ-Ишкошим, ки бар асари фаромадани 20 тарма банд буд, дубора кушода шуд

ХОРУҒ, 11.02.2019 /АМИТ «Ховар»/. Бар асари боришоти барфи зиёди рўзҳои аввали моҳи феврал роҳи мошингарди Хоруғ- Ишкошим боз дар банди тармаҳо монд. Дар ин масир танҳо дар се – чор рӯзи охир боз 20 тарма рӯи роҳи мошингард рехт ва ҳаракати роҳро барои мошинҳои сабукраву боркаш ғайриимкон гардонид. Бо саъю талоши шабонарӯзии роҳсозони идораи «Бадахшонроҳ» давоми се рӯз тармаҳо пок ва ҳаракати мошинҳои гуногунтамға дубора барқарор гардид.

Бино ба иттилои сардори Муассисаи давлатии нигоҳдории роҳҳои мошингарди ноҳияи мазкур Асрор Мирзонаботов,  ғафсии барф дар кӯҳдоманҳо то якуним метр расида, бо каме гарм шудани ҳаво шумораи тармафароӣ афзоиш ёфт. Ҳанӯз ҳам фаромадани тарма аз эҳтимол дур нест. Аз  ин рӯ  се техникаи пуриқтидор дар ин мавзеъ қарор доранд.

Тармафароӣ ба сокинони деҳаи Андарби ноҳия низ хисороти моддӣ расонид. Сокини деҳаи мазкур Маҳрам Қурбонбеков гуфт, ки тарма як манзилро вайрон кард. Хушбахтона, соҳибони хонаро наҷот доданд, аммо 20 сар чорвои калону майда зери тарма монданд. Зиёда аз 50 дарахти сояафкану мевадор ҳам нобуд шуданд. Сокинони куҳансоли деҳа мегӯянд, ки дар 80 соли охир чунин боришоту тармафароиро мушоҳида накардаанд.