«Саҳрои бекаронаи таърих»- и Садриддин Ҳасанзода навъе аз пажўҳиш ва хулосабарориҳои журналистӣ арзёбӣ гардид

ДУШАНБЕ, 27.02.2019./АМИТ «Ховар»/. Имрӯз дар Вазорати фарҳанги Ҷумҳурии Тоҷикистон рӯнамоии китоби тозанашри нависанда Садриддин Ҳасанзода-маҷмӯаи очеркҳои публитсистӣ таҳти унвони «Саҳрои бекаронаи таърих», ки аз се ҷилд иборат аст, баргузор гардид.

Тавре мухбири АМИТ «Ховар» хабар медиҳад, дар маросими рӯнамоӣ Вазири фарҳанги Ҷумҳурии Тоҷикистон Шамсиддин Орумбекзода, Шоири халқии Тоҷикистон Муҳаммад Ғоиб, Шоири халқии Тоҷикистон Гулназар Келдӣ ва дигар меҳмонону адибон  иштирок доштанд.

Зимни ҳамоиш Шамсиддин Орумбекзода баён дошт, ки маҷмўаи мазкур бо илҳом аз асарҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон «Тоҷикон дар оинаи таърих. Аз Ориён то Сомониён», «Нигоҳе ба таърих ва тамаддуни Ориён» эҷод гашта, як навъ тафсири бобҳои алоҳидаи ин асарҳои безавол, ҳамчунин шарҳи баъзе аз бахшҳои асари аллома Бобоҷон Ғафуров «Тоҷикон» ба шумор меравад.

Ба иттилои Вазири фарҳанги ҷумҳурӣ, китоби мазкурро метавон навъе аз пажўҳиш ва хулосабарориҳои журналистӣ номид.

Тавре дар ҳамоиш зикр гардид, китоби мазкур барои тарбияи хештаншиносӣ, ватандўстии насли ҷавони мамлакат ва эҳтироми онҳо ба фарҳанги ниёгон муфид аст.

Бояд гуфт, ки Садриддин Ҳасанзода нависандаи нозукбаён, фасеҳгуфтор, рӯзноманигори ҳақиқатнигор, ҷӯянда, заҳматкаш буда, повести аввалинаш соли 1989 аз тариқи нашрияи «Адиб» ба табъ расидааст. Ӯ муаллифи даҳҳо маҷмӯаҳои қисса, ҳикоя, очерк, тарҷумаҳо – «Эҳёи Када», «Чароғи лола», «Дарёи нур», «Доғи сӯзон», «Пуштаи зардолуҳо», «Рўшноӣ – растагорӣ. Роғун; баҳс ва воқеият», «Ашки қалам», «Нашъамандӣ ва ҷомеа», «Муҷассамаи нодир», «Ёдҳои парокандаи бодияҳо», «Чароғи давра», «Мифтоҳи ганҷ», «Саҳифаҳои ҷолиб», «Иморати сухан», «Фарҳангшиносӣ», 150 мақолаи илмӣ – оммавӣ ва 15 филми мустанади телевизионӣ мебошад.