Саршумори қутос дар Мурғоб ба 19 ҳазор сар расидааст. Имрӯз гӯшту шири он аз ҷиҳати экологӣ тозатарин ҳисобида мешавад

ХОРУҒ, 08.02.2019 /АМИТ «Ховар»/.  То соли 2009 дар ҳамаи шаклҳои хоҷагидории Вилояти Мухтори Кӯҳистони Бадахшон зиёда аз 15 ҳазору 100 сар қутос мавҷуд буд. Маҳз  ҳамон сол Ҳукумати ҷумҳурӣ барои  рушди қутоспарварӣ  қарори махсус  ба тасвиб расонид, ки мутобиқи он ҳамасола барои рушди ин соҳа 200 ҳазор сомонӣ ва давоми панҷ сол 3 миллиону 950 ҳазор сомонӣ ҷудо гардид.

Тавре сардори Раёсати кишоварзии вилоят Абдуласан Мамадасанов ба хабарнигори минтақавии АМИТ “Ховар” гуфт,  «баъди қарори мазкур дар кишвар меъёру қоидаҳои миллии соҳаи қутоспарварӣ таҳия  ва аз тарафи Агентии “Тоҷикстандарт” ба қайд гирифта шуданд. Ин тадбирҳо имконият доданд, ки саршумори қутос давоми 20 сол як баробар афзояд. То 1 январи соли равон танҳо дар хоҷагиҳои қутоспарварии Вилояти Мухтори Кӯҳистони Бадахшон саршумори қутос ба 24 ҳазору 11 сар расид, ки 19 ҳазори он дар чарогоҳҳои баландкӯҳи ноҳияи Мурғоб парвариш меёбанд. Афзоиши саршумори қутос   нархи ширу гӯшти онро дар як сатҳ нигоҳ дошт. Агар нархи як кило гӯшти ин навъи ҳайвон дар кишвари ҳамсояи Қирғизистон 45-48 сомонӣ бошад, пас дар бозори шаҳри Хоруғ он 34 сомонӣ мебошад».

Қутоспарварӣ яке аз соҳаҳои камхарҷ ва сердаромад ба шумор рафта, гӯшту шири қутос аз ҷиҳати экологӣ тозатарин ҳисобида  мешаванд. Сол аз сол талабот  ба ин маҳсулот на танҳо дар Тоҷикистон, балки дар ҷаҳон бештар мегардад.