Ширкати «IRS»: роҳи мошингарди «Душанбе-Чаноқ» муваққатан баста шуд

ДУШАНБЕ, 05.02.2019./АМИТ «Ховар»/. Бинобар шадид ва беист будани бориши барф ва ниҳоят зиёд будани хавфи тармафароӣ дар асоси муқаррароти фармоиши якҷояи вазоратҳои корҳои дохилӣ ва нақлиёти мамлакат ҳаракати ҳама намуди воситаҳои нақлиёт аз километри 47 — уми роҳи мошингарди Душанбе-Чаноқ ба самти Хуҷанд ва аз километри 81- ум ҷониби Душанбе муваққатан боздошта шуд. Дар ин бора ба хабарнигори  АМИТ «Ховар» сардори Маркази матбуоти филиали Ширкати саҳомии «Инновейтив Роуд Солюшнз ЛТД» дар Ҷумҳурии Тоҷикистон Далери Абдулло хабар дод.

Бино ба иттилои манбаъ, дирӯз кормандони ширкат 10 тармаи хурду бузургро бартараф намуданд. Аз оғози мавсими сармо теъдоди тармаҳои бартарафшуда зиёда аз 80 ададро ташкил медиҳад.

Ҳамчунин сардори Маркази матбуоти ширкати мазкур изҳор дошт, ки «кормандони ширкат шабонарӯз заҳмат мекашанд, то рафтуомади бемонеа ва муназзами шаҳрвандон тавассути роҳи мошингарди Душанбе-Чаноқ таъмин бошад. Вале дар сурати ҷиддӣ ва беист будани хавфи тармафароӣ ба ҳаракати мошинҳо иҷозат дода намешавад, зеро ҳифзи ҳаёти онҳо аз ҳама чиз авлотар аст. Дар робита ба ин аз шаҳрвандон хоҳишмандем, ки дар чунин вазъи ҳаво бе зарурат ба роҳ набароянд. Мо кӯшиш ба харҷ медиҳем, то дар наздиктарин фурсат монеаҳоро бартараф ва ҳаракати воситаҳои нақлиёт таъмин бошанд».

Ёдовар мешавем, ки қаблан Агентии обуҳавосанҷӣ ва Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ҳушдор дода буданд, ки моҳи феврали соли равон дар муқоиса ба соли гузашта нисбатан сербориш мешавад.