Тоҷикистон аз рӯи афзоиши ММД дар байни кишварҳои ИДМ пешсаф аст

ДУШАНБЕ, 16.02.2019./АМИТ «Ховар»/. Афзоиши аз ҳама зиёди маҷмӯи маҳсулоти дохилӣ (ММД) дар байни кишварҳои Иттиҳоди Давлатҳои Мустақил дар Тоҷикистон ба қайд гирифта шуд – ин нишондиҳанда дар ҷумҳурӣ  7,3% -ро ташкил медиҳад.  Дар ин бора АМИТ «Ховар» бо истинод ба маълумоти Кумитаи омори ИДМ хабар медиҳад. 

Аз рӯи афзоиши ММД Туркманистон бо 6,2% дар ҷойи дуюм ва Арманистон бо 6% дар ҷойи сеюм қарор доранд. Тибқи маълумоти ин кумита, афзоиши тахминии ММД дар қаламрави ИДМ 2,2%-ро ташкил медиҳад.

Миёни кишварҳои дорои афзоиши камтари ММД Украина-2,8%, Россия-2,3% ва Озарбойҷон-1,4%   номбар шудаанд.

Илова бар ин, Тоҷикистон аз рӯи афзоиши истеҳсоли маҳсулоти саноатӣ ба сегонаи пешсафи Иттиҳоди Давлатҳои Мустақил шомил гардид. Тибқи ин нишондиҳанда Ӯзбекистон бо 14,4% дар  ҷои аввал, Тоҷикистон бо 11,8% дар  ҷои  дуюм ва Беларус бо 5,7% дар мавқеи сеюми радабандӣ қарор доранд. Афзоиши камтар дар Россия — 2.9%, Озарбойҷон — 1,5% ва Украина — 1,1% фоиз ба қайд гирифта шудааст. Ба ҳисоби миёна, афзоиши истеҳсолоти саноатӣ дар кишварҳои ИДМ 2,8%-ро ташкил медиҳад.

Ёдовар мешавем, ки соли 2018 ҳаҷми ММД Тоҷикистон 68,8 миллиард сомонӣ ё бештар аз 7,3 миллиард доллари ИМАро ташкил дод. Афзоиши иқтисодиёт аз нақшаи интизории ҳукумат 0,3% барзиёд таъмин гардид.