«МАН НАКУНАМ, КӢ МЕКУНАД?». Вакилони парлумони Тоҷикистон имрӯз ба ҳашари умумихалқӣ баромаданд

ДУШАНБЕ, 16.03.2019/АМИТ «Ховар»/. Вакилони Маҷлиси намояндагон ва кормандони масъули Дастгоҳи парлумони касбии мамлакат яке аз аввалинҳо шуда, ташаббусҳои наҷиби Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар самти корҳои созандагию  бунёдкории Ватани азизамон дастгирӣ намуда, имрӯз дар арафаи ҷашни Наврӯзи дилафрӯз ва 30-солагии Истиқлолияти давлатии  Тоҷикистон ба ҳашари умумихалқӣ баромаданд.

Дар ин раванд вакилони Маҷлиси намояндагон ва кормандони масъули Дастгоҳи Маҷлиси намояндагон бо рӯҳияи баланди ватандорӣ ва ободкорӣ баҳри он ҷиду ҷаҳд доранд, ки санаи барои миллати тоҷик тақдирсозро бо дастовардҳои назаррас истиқбол гиранд.

Баҳри ин мақсади наҷиб бо иқдоми бевоситаи Дастгоҳи Маҷлиси намояндагон дар парлумони касбии мамлакат имрӯз таҳти унвони  «Ҷон ба раҳи Ватан нисор ман накунам, кӣ мекунад?» ҳашари умумихалқӣ  доир гардид.

Дар ҳашари мазкур зиёда  аз 100  нафар кормандони Дастгоҳ ва вакилони Маҷлиси намояндагон ширкат доштанд.   Кормандони Дастгоҳи Маҷлиси намояндагон  бо рухияи болида ва шукргузори аз сиёсати созандаи Ҳукумати Ҷумҳурии Тоҷикистон  чун  яктан барои тоза кардани бехи дарахтон,  хоки замини макони фароғатиро  канда аз ғалбер гузаронида, сангу шағали онро ҷудо намуданд ва ба таъмиру тармими бинои Маҷлиси намояндагон  камари ҳиммат бастанд. Иттифокӣ, ҳамбастагӣ ва пайрави аз тадбирҳои нек ва муттахиди дар атрофи  сиёсати хирадмандонаи Пешвои миллат  нишон дод, ки масъулини Маҷлиси намояндагон нисбат ба корҳои неку созанда бетараф нестанд ва ҳамеша омодаанд саҳми худро дар ин кори хайр  гузоранд.

«Ҳар як ҷавони ба ору номуси Маҷлиси намояндагон тасмим гирифтаанд, ки дар зебо ва обод гардонидани ватани азизамон саҳми арзандаи худро гузорад ва ҷашни 30-солагии Истиқлолияти давлатии Ҷумҳурии Тоҷикистонро бо дастовардҳои назаррас истиқбол намояд»-гуфт Роҳбари Дастгоҳи Маҷлиси намояндагони Маҷлиси Олии Ҷумҳурии Тоҷикистон Мизроб Кабиров.

«Ҳадафи дигари чорабинии мазкур тақвияти ҳисси ватандустиву худшиносии милли, бедор намудани ифтихори ватандори, тарбияи ҷавонон дар руҳияи инсондустӣ, якдили, якмароми, баробариву бародари ва тахкими сулҳу ваҳдати миллӣ мебошад»,- афзуд  дар анҷом  муовини якуми Раиси Маҷлиси намояндагони Маҷлиси Олии Ҷумҳурии Тоҷикистон Абдуҷаббор Азизӣ.

Дил ба ғами Ватан фигор ман накунам, кӣ мекунад?
Ҷон ба раҳи Ватан нисор ман накунам, кӣ мекунад? 

Ҳашари имрӯзаи вакилон воқеан ҳам мисраъҳои адиби бедордили миллат, Шоири халқии Тоҷикистон Ғаффор Мирзоро ба ёд меорад, ки дар бораи ватандорони бонангу номус гуфтааст, дар бораи онҳое, ки ҳамеша дар ғаму шодии миллат шарик буда, тамоми ҳастии хешро баҳри сарсабзию хуррамӣ ва суботу пойдории Ватани азизи худ мебахшанд.