Озмуни «Хабарнигор» байни хонандагони мактабҳои шаҳри Кӯлоб ҷамъбаст гардид

ДУШАНБЕ, 16.03.2019/АМИТ «Ховар»/. Ба пешвози «Ҳафтаи китоби кӯдакону наврасони Тоҷикистон» дар толори машваратии Муассисаи давлатии Китобхонаи оммавии вилояти Хатлон ба номи С.Айнӣ дар шаҳри Кӯлоб бо ташаббуси Китобхонаи вилоятии бачагонаи шаҳр миёни хонандагони мактабҳои таҳсилоти миёнаи умумӣ озмуни «Хабарнигор» гузаронида шуд.

Тавре аз Вазорати фарҳанги Ҷумҳурии Тоҷикистон ба АМИТ «Ховар» хабар доданд, ҳамасола оғози моҳи апрел дар кишвар бо ташаббуси Вазорати фарҳанги ҷумҳурӣ ва Китобхонаи давлатии бачагонаи ҷумҳуриявии ба номи Мирсаид Миршакар Фестивали ҷумҳуриявии «Ҳафтаи китоби кӯдакону наврасони Тоҷикистон» гузаронида мешавад. Озмуни мазкур ба ин Ҳафта бахшида шуда буд.

Иштирокчиёни озмун ба ҳайати доварон маводи хабарии омодакардаи худро манзур намуданд. Хонандаи синфи 6-и МТМУ-№5 Саодати Бозор ғолиби озмун дониста шуда, ба даври ниҳоӣ, ки дар доираи «Ҳафтаи китоби кӯдакону наврасони Тоҷикистон» дар шаҳри Душанбе сурат мегирад, роҳ ёфт.