Қурбон Ҳакимзода: «Ҷиҳати бунёди иншоот бахшида ба 30- солагии Истиқлолияти давлатӣ мебояд ба соҳибкорон ва сармоягузорон бештар такя намуд»

БОХТАР, 01.03.2019. /АМИТ «Ховар»/. Дар  ноҳияи  Ёвони вилояти  Хатлон  сохтмони  341  адад иншоот  дар  доираи омодагиҳо  ба  ҷашни 30-солагии  Истиқлолияти  давлатии  Ҷумҳурии  Тоҷикистон    ба  нақша  гирифта  шудааст.  Дар  ин  бора  зимни вохӯрӣ  бо  фаъолони  ноҳияи Ёвон  раиси  вилояти Хатлон  Қурбон Ҳакимзода    изҳори назар намуд. 

«Давоми се  соли оянда  сохтмони  иншооти таълимӣ,  фарҳангӣ, истеҳсолӣ ва роҳҳо  ба  нақша  гирифта  шудааст.  Дар  ин  самт мебояд  бештар  такя  ба  соҳибкорон  ва сармоягузорон    намуда,   барои амалӣ  гаштани лоиҳаҳо  мусоидат  бояд  кард»,-таъкид  намуд Қ. Ҳакимзода.

Дар  ҷараёни мулоқот ҳамзамон зикр гардид,  ки  бунёди иншооти хизматрасонӣ,  тиббӣ  ва  истеҳсолиро   бояд дар  деҳот бештар кард.  «Ин  барои таъсиси  ҷойҳои нави  корӣ ва бо шуғл фаро гирифтани аҳолӣ мусоидат мекунад»,-иброз дошт  раиси вилояти  Хатлон.

Дар доираи сафари  корӣ ба  ноҳияи  Ёвон раиси  вилояти Хатлон Қурбон Ҳакимзода    бо  ҷараёни  корҳои сохтмони  иншооти  ба истиқболи ҷашн бунёдшаванда  шинос  гардида,  бо  собиқадорони меҳнат ва  фаъолон суҳбат намуд.