Вазири рушди иқтисод ва савдои Тоҷикистон бо Вазири иқтисоди Ҷумҳурии Озарбойҷон мулоқот намуд

ДУШАНБЕ, 15.03.2019 /АМИТ «Ховар»/. 13 ва 14 марти соли 2019 дар ҳошияи Форуми VII байналмилалии Боку, ки ҳамасола бо ташаббуси Маркази байналмилалии Низомии Ганҷавӣ баргузор мегардад, мулоқоти Вазири рушди иқтисод ва савдо Неъматулло Ҳикматуллозода бо Вазири иқтисоди Ҷумҳурии Озарбойҷон, ҳамраиси Комиссияи байниҳукуматии Тоҷикистон ва Озарбойҷон оид ба ҳамкории иқтисодиву тиҷоратӣ Шоҳин Мустафоев сурат гирифт. Дар ин бора ба АМИТ «Ховар» аз Сафорати Тоҷикистон дар Озарбойҷон хабар доданд.

Зимни мулоқот, ки бо ҷалби коршиносони соҳавии ҷониби Озарбойҷон баргузор гардид, маҷмӯи ҳамкории дуҷониба мавриди муҳокима қарор гирифт. Таваҷҷуҳи асосӣ ба мавзӯи афзоиш додани ҳамлу нақли транзитии борҳои Тоҷикистон тавассути Озарбойҷон равона гардид.

Ҷониби Озарбойҷон омодагии худро ҷиҳати баррасии масъалаи фароҳам овардани шароити беҳтар барои интиқолгарони Тоҷикистон, хусусан бо пешниҳоди тарофаҳои муносиби нақлиётиву транзитӣ барои интиқоли борҳо бо роҳҳои заминӣ, оҳан ва баҳрии он кишвар изҳор намуд.