ФУТБОЛ: дастаи мунтахаби бонувони Тоҷикистон дар Дакка бо дастаҳои Муғулистону Лаос бозӣ мекунад

ДУШАНБЕ, 10.04.2019. /АМИТ «Ховар»/. Ҳарифони дастаи мунтахаби бонувони то 19-солаи   Тоҷикистон оид ба футбол   дар мусобиқаи байналмилалии «Bangamata U-19 Women’s International Gold Cup 2019», ки аз 23 апрел то 3 майи соли равон дар пойтахти Бангладеш- шаҳри Дакка баргузор мешавад, маълум гардиданд.

Тавре аз  Федератсияи  футболи  Тоҷикистон ба мухбири АМИТ «Ховар» хабар доданд, дар асоси қуръакашии мусобиқаи мазкур дастаи  мунтахаби  бонувони Тоҷикистон ба гурӯҳи «А» шомил гардид. Он бо дастаҳои мунтахаби бонувони ҷавони Муғулистон (23 апрел) ва Лаос (27 апрел) вомехӯрад.

Бояд зикр кард, ки гурӯҳи «В» аз дастаҳои мунтахаби  бонувони  Бангладеш, АМА ва Қирғизистон таркиб ёфтааст. Пас аз натиҷагирии бозиҳои гурӯҳӣ ду дастаи беҳтарин аз ҳар ду гурӯҳ ба нимфинал роҳ меёбанд ва муборизаро идома медиҳанд.

Ҳоло дастаи  мунтахаби бонувони ҷавони Тоҷикистон, иборат аз  23 нафар бозингар бо роҳбарии сармураббӣ Қаноат Латифов дар шаҳри Норак ба ҷамъомади машқӣ-таълимӣ фаро гирифта шудаанд.