ОФАРИН! Дастаи мунтахаби то 15-солаи Тоҷикистон соҳиби Ҷоми «Роҳи абрешим-Ҳуа-Шан-2019» гардид

ДУШАНБЕ, 11.04.2018. /АМИТ «Ховар»/.  Дастаи  мунтахаби наврасони то 15-солаи Тоҷикистон  дар даври охирини мусобиқаи байналмилалии Ҷоми “Роҳи абрешим – Ҳуа Шан” (Silk Road – Hua Shan Cup-2019) бо дастаи мунтахаби Чин вохӯрда, бозиро бо натиҷаи 0:0 ҷамъбаст кард ва дар маҷмӯъ соҳиби Ҷом гардид.

Шогирдони Аҳлиддин Турдиев дар силсилаи рақобатҳо бар Қирғизистон бо натиҷаи 8:0 ва бар Мйанма 5:0 пирӯзӣ ба даст оварданд.

Дар расми ҷамъбасти мусобиқа ба футболбозони навраси тоҷик  Ҷоми мусобиқа тақдим гардид. Ҳамчунин унвони беҳтарин дарвозабон ба Сафармад Ғаффоров, беҳтарин ҳамлагар ба Абдулфаттоҳ Худойдодзода ва беҳтарин нишонзан ба Муҳаммадворис Сайдалиев мансуб дониста шуд.

Иштирок дар мусобиқаи байналмилалии Ҷоми “Роҳи абрешим – Ҳуа Шан” (Silk Road – Hua Shan Cup-2019) яке аз марҳилаҳои омодагӣ ба бозиҳои интихобии Чемпионати Осиё ба ҳисоб меравад.