Дар Душанбе ҷаласаи навбатии Шӯрои ҳамоҳангсозии фаъолияти мақомоти санҷишӣ доир гардид

ДУШАНБЕ, 24.05.2019/АМИТ «Ховар»/. Имрӯз дар шаҳри Душанбе таҳти раёсати муовини аввали Сарвазири  Ҷумҳурии Тоҷикистон Давлаталӣ Саид, ки ҳамзамон раиси Шӯрои ҳамоҳангсозии фаъолияти мақомоти санҷишӣ аст, ҷаласаи навбатии Шӯрои мазкур  баргузор гардид.

Дар он  роҳбарону намояндагони вазорату идораҳои марбутаи ҷумҳур, ки аъзои Шӯро мебошанд, Кумитаи давлатии сармоягузорӣ ва идораи амволи давлатӣ, вазирони адлия, молия, рушди иқтисод ва савдо, тандурустӣ ва ҳифзи иҷтимоии аҳолӣ, саноат ва технологияҳои нав, корҳои дохилӣ, кишоварзӣ, Кумитаи давлатии идораи замин ва геодезӣ, бахши хусусӣ, инчунин намояндагони Прокуратураи генералӣ ва Кумитаи андоз иштирок намуданд.

Тавре аз Кумитаи давлатии сармоягузорӣ ва идораи амаволи давлатӣ ба АМИТ «Ховар» иттилоъ доданд,  масъалаи ба феҳристи субъектҳои соҳибкорӣ дар соҳаҳои истеҳсолӣ ворид намудани рӯйхати шахсони ҳуқуқӣ ва соҳибкорони инфиродие, ки ба соҳаҳои истеҳсолӣ мансубанд ва ҳисоботи омориро оид ба истеҳсолот ба мақоми ваколатдори давлатӣ дар соҳаи омор месупоранд, дар меҳвари  ҷаласаи  мазкур  қарор дошт.

«Дар ҷаласа ҳамзамон масъалаи аз феҳристи қайдгардида хориҷ намудани субъектҳое, ки дар давраи татбиқи мораторий ба санҷишҳо фаъолияти худро ба самтҳои хизматрасониву савдо, ё ин ки фаъолияти худро пурра ё муваққатан қатъ намудаанд, баррасӣ гардид,-афзуд манбаъ.