Дар Осорхонаи миллии Тоҷикистон ба ифтихори Рӯзи Ғалаба намоиш оғоз меёбад

ДУШАНБЕ, 01.05.2019 /АМИТ «Ховар»/.  Ба ифтихори  Рӯзи Ғалаба дар  Ҷанги  дуюми ҷаҳонӣ   3 майи соли равон  дар Осорхонаи  миллии Тоҷикистон бо иштироки собиқадорони ҷангу меҳнати шаҳри Душанбе намоиши «Ҳеҷ  кас ва ҳеҷ  чиз фаромӯш нашудааст» ифтитоҳ мегардад. 

Тавре ба мухбири АМИТ «Ховар»  сардори шуъбаи таърихи нав ва навтарини Осорхонаи миллии Тоҷикистон Фирдавси Абдулҳамид хабар дод, намоиши мазкур  то  20 майи соли равон идома ёфта, дар он  аз фонди  Осорхонаи миллии  Тоҷикистон  намунаи аризаҳои пешниҳоднамудаи  ихтиёриёни ин ҷанг: Марям Абдуллоева, Сайид Баротов, Солӣ Одилов ва  мактубҳои  Машраб Ахмедов, Абдусаттор Қодиров, ки аз майдони ҷанг ба хонадони худ навиштаанд, ба маъраз  гузошта мешаванд.

Инчунин лавозимоти ҷангӣ, аз қабили сумкаи саҳроии Қаҳрамони Иттиҳоди Шӯравӣ Сафар Амиршоев, миёнбанди Қаҳрамони Итиҳоди Шӯравӣ Ҳодӣ Кенҷаев, дурбини иштирокчии ҷанг Чароғ Қодиров, обдон ва қутбнамои иштирокчии ҷанг Раҷабалӣ Ҷалилов  ба намоиш гузошта хоҳанд  шуд. Ордену медалҳои дар намоиш пешниҳодшуда аз далерию матонати иштирокчиёни Ҷанги дуюми ҷаҳонӣ ва заҳматҳои фаромӯшнашавандаи меҳнаткашони ақибгоҳ шаҳодат медиҳанд.

Ҳамзамон дар намоиш аз фонди Осорхонаи  миллии  Тоҷикистон 23 адад мусаввараҳои  рассомон, ки ба  мавзӯи ин ҷанг бахшида  шудаанд, пешниҳоди  тамошобинон мегарданд. Офаридаҳои рассомон А. А. Қосимов «Гусел», И. Р. Рахнаев «Симои қаҳрамони ҷанг Неъмат  Қарабоев», Ю. Н. Сангов  «Вохӯрии ғолибон», Ф. А. Салманов «Душман нигоҳ дошта шуд», А. Н. Камелин «Помир дар  солҳои ҷанг», А. П. Белетский «Симои София  Ниёзова», М. А. Зубреева «Ҷамъоварии туҳфаҳо ба Армияи Сурх, 1944», Н. Н. Никитин «Дуои модар» инъикосгари  ин   саҳифаи  таърихи  халқи  тоҷик  мебошанд.

Инчунин дар  намоиш 8 адад аксҳои Қаҳрамонони Иттиҳоди Шӯравӣ аз Ҷумҳурии  Тоҷикистон: Тӯйчӣ Эрҷигитов, Неъмат Қарабоев, Домулло Азизов, Саидқул Турдиев, Исмат Шарипов, Имоил Ҳамзаалиев, Ҳодӣ Кенҷаев, Урунбек Яъқубов ва   плакатҳои гуногуни марбут  ба замони  Ҷанги дуюми ҷаҳонӣ ба намоиш гузошта мешаванд.