Сармуҳаррири рӯзномаи «Халқ овози» ғолиби озмуни байналмилалии «Килки тиллоӣ» шуд

ДУШАНБЕ, 13.05.2019. /АМИТ «Ховар»/.  Сармуҳаррири нашрияи Ҳукумати Ҷумҳурии Тоҷикистон – рӯзномаи «Халқ овози» Ёқубҷон Абдуманонзода  ғолиби озмуни байналмилалии «Килки тиллоӣ» («Олтин қалам»)-и Иттифоқи   журналистони Ӯзбекистон гардид.

Дар ин бора ба АМИТ «Ховар» аз идораи рӯзномаи  «Халқ овози» хабар дода, афзуданд, ки Ёқубҷон Абдуманонзода дар бахши «Беҳтарин мақолаи журналистони хориҷӣ дар бораи Ӯзбекистон» ғолиб дониста шуд. Ҷоизаи озмуни мазкур рӯзҳои наздик ба мавсуф супорида мешавад.

Ба иттилои манбаъ, ба озмун журналистони зиёди хориҷӣ маводи худро пешниҳод карда, дар баробари рӯноманигорон аз Британияи Кабир, Беларус, Малайзия ва Ҷумҳурии Мисри Араб  сармуҳаррири   рӯзномаи «Халқ овози» низ дар он ғолиб дониста шуд.

Бояд гуфт, ки Ёқубҷон Абдуманонзода барои силсиламақолаҳои худ, ки ба мавзӯи муносибатҳои дӯстиву шарикии стратегии Тоҷикистону Ӯзбекистон бахшида шудаанд, бо ин ҷоиза сарфароз гардонида шуд.

Ёдовар мешавем, ки озмуни байналмилалии «Килки тиллоӣ» («Олтин қалам») ҳамасола аз ҷониби Иттифоқи эҷодии журналистони Ӯзбекистон доир мегардад. Мақсади асосии баргузории он инъикоси  мавзӯъҳои марбут ба дӯстиву ҳамҷавории Ӯзбекистон бо кишварҳои хориҷа мебошад.