Шоми имрӯз Фестивали ҷумҳуриявии ансамблҳои оилавии «Дунёи саодат» ҷамъбаст мегардад

ДУШАНБЕ,  15.05.2019. /АМИТ «Ховар»/. Бахшида ба Рӯзи байналмилалии оила шоми имрӯз дар Филармонияи давлатии Тоҷикистон ба номи А. Ҷӯраев ҷамъбасти Фестивали ҷумҳуриявии ансамблҳои оилавӣ таҳти унвони «Дунёи саодат» баргузор мегардад.

Тавре аз маркази матбуоти Вазорати фарҳанги Ҷумҳурии Тоҷикистон ба АМИТ «Ховар» хабар доданд, фестивал бо мақсади рушди фаъолияти ансамблҳои оилавӣ, дарёфти истеъдодҳои нав, ҷалб ва фарогирии  ҳарчи  бештари мардуми кишвар ба фарҳангу санъат  ва  ба ин восита баланд  бардоштани нақши оила дар тарбияи ҳисси зебоиписандии ҷавонону наврасон баргузор мешавад.

Дар барнома 13 ансамбли беҳтарини оилавӣ аз шаҳру ноҳияҳои ҷумҳурӣ, ки ба даври ҷамъбастии Фестивал роҳхат гирифтаанд, иштирок мекунанд.

Ёдовар мешавем, ки даври аввали фестивал оғози моҳи апрел шурӯъ гардида, дар он танҳо ансамблҳои оилавии вилоятҳо ва шаҳру ноҳияҳои ҷумҳурӣ, ки ҳайаташон на зиёда аз 20 нафар аст, иштирок карданд.

Барномаи фестивал дастовардҳои ҳунарии ансамблҳои оилавиро инъикос намуда, муҳтавои он тарғибу ташвиқи дўстӣ, Ваҳдати миллӣ ва якпорчагии Тоҷикистон мебошад.