Тоҷикистон беш аз 300 нафар шаҳрвандони худро аз минтақаҳои даргири Шарқи Наздик ба Ватан бозгардонид

ДУШАНБЕ, 17.05.2019/ АМИТ «Ховар»/. Ҳукумати Тоҷикистон дар зарфи солҳои охир аз кишварҳои хориҷӣ беш аз 300 нафар шаҳрвандони худро, ки ҷиҳати пайвастан ба гурӯҳҳои ҷангҷӯёни террористиву ифротгаро, бахусус «Давлати исломӣ» ба минтақаҳои даргири Шарқи наздик рафта буданд, ба Ватан баргардонидааст. Инчунин охири моҳи апрели соли равон бо саъю талошҳои Ҳукумати Тоҷикистон 84 нафар кӯдакону ноболиғон, ки ҳамроҳ бо волидайни худ ба Ироқ рафта, дар онҷо бе парастору саробон монда буданд, ба Душанбе баргардонида шуданд.

Тавре Президенти Ҷумҳурии Тоҷикистон мухтарам Эмомалӣ Раҳмон дар суханронияшон дар ҳамоиши сатҳи баланд, ки имрӯз дар мавзӯи «Ҳамкории байналмилалӣ ва минтақавӣ дар мубориза бо терроризм ва манбаъҳои маблағгузории он, аз ҷумла гардиши ғайриқонунии маводи мухаддир ва ҷинояткории муташаккил» дар Душанбе доир гардид, иброз доштанд, «корҳо дар самти ба Ватан баргардонидани дигар шаҳрвандони кишвар, ки фирефтаи ташвиқоту таблиғоти созмонҳои террористӣ ва тундгаро гашта, дар минтақаҳои задухӯрдҳои мусаллаҳона қарор доранд, ҳамоно идома доранд».

Бояд тазаккур дод, ки ба Ватан баргардонидани 84 нафар фарзандон ва он ашхосе, ки гумроҳ гардидаю ба сафи гурӯҳҳои террористӣ пайвастанд, баъдан аз кирдори худ пушаймон гардида, дар Тоҷикистон мавриди авф қарор гирифтанд, аз иқдомҳои башардӯстонаи Ҳукумати ҷумҳурӣ ва Пешвои миллат башорат медиҳанд.