Вакилони Парлумон ҷараёни саноатикунонии Тоҷикистонро баррасӣ намуданд
![](https://khovar.tj/wp-content/uploads/2019/05/parlament-_2.jpg)
ДУШАНБЕ, 07.05.2019 /АМИТ «Ховар»/. Имрӯз таҳти раёсати муовини Раиси Маҷлиси намояндагони Маҷлиси Олии Ҷумҳурии Тоҷикистон Акрамшо Фелалиев бо иштироки вакилони Маҷлиси намояндагон ва роҳбарони як зумра вазорату кумитаҳои дахлдори мамлакат дар мавзӯи “Ҷараёни саноаткунонии кишвар ҳамчун ҳадафи чоруми стратегияи миллӣ” муҳокимаи парлумонӣ баргузор гардид.
Тавре котиби матбуоти палатаи поёнии Парлумони Тоҷикистон Муҳаммадато Султонов ба АМИТ «Ховар» иттилоъ дод, муовини якуми Вазири саноат ва технологияҳои нави Ҷумҳурии Тоҷикистон Бахтиёр Шарипов иброз намуд, ки Вазорати саноат ва технологияҳои нави Ҷумҳурии Тоҷикистон бо корхонаҳои соҳавӣ дар семоҳаи аввали соли равон ҷиҳати тадбиқи амалии ҳадафи чоруми стратегии давлат-яъне гузариши иқтисодиёти мамлакат аз самти аграрӣ-саноатӣ ба индустриалӣ–аграрӣ, инчунин иҷрои қарори Ҳукумати Ҷумҳурии Тоҷикистон аз 30 январи соли 2019 «Дар бораи ҷамъбасти натиҷаҳои рушди иҷтимоию иқтисодии Ҷумҳурии Тоҷикистон дар соли 2018 ва вазифаҳо барои соли 2019» корҳои муайян ба анҷом расонид.
Дар давраи ҳисоботӣ ҳаҷми истеҳсоли маҳсулоти саноатӣ дар ҷумҳурӣ ба 5 млрд 721 млн сомонӣ расоанида шуда, суръати афзоиш нисбат ба ҳамин давраи соли 2018 ба 115,9% баробар шуд, ки афзоиш 792,9 млн сомониро ташкил дод.
Афзоиши ҳаҷми истеҳсоли маҳсулот дар саноати ангишт 152,4%, саноати маъдани кӯҳӣ 115,0%, саноати масолеҳи сохтмон 111,1%, саноати сабук 113,5%, саноати мошинсозӣ 110,6%, саноати табъу нашр 169,8%, саноати хӯрокворӣ 118,4%, корхонаҳои пахтатозакунӣ 67,9%, нафт ва газ 124,5% ва электроэнергетика 123,3%-ро ташкил дод.
Рушди саноат дар ҳамаи минтақаҳои ҷумҳурӣ таъмин гардида, дар ВМКБ 105,0%, вилояти Суғд 116,4%, вилояти Хатлон 107,3%, шаҳри Душанбе 122,3% ва навоҳии тобеи ҷумҳурӣ 149,4%-ро ташкил дод.
Ба иттилои манбаъ, дар анҷоми муҳокимаи парлумонӣ роҳбарони вазорату кумитаҳои дахлдори мамлакат ба саволҳои сершумори вакилони Маҷлиси намояндагон посух гуфтанд.