Вазири корҳои хориҷии Япония Таро Коно: «Япония бо Тоҷикистон муносибатҳои дӯстона дорад»

ДУШАНБЕ, 18.05.2019 /АМИТ «Ховар»/.  Имрӯз  дар Бӯстонсарои шаҳрии Ҳукумати Ҷумҳурии Тоҷикистон Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳошияи Мулоқоти ҳафтуми вазирони корҳои хориҷии Муколамаи «Осиёи марказӣ + Япония» Вазири корҳои хориҷии Япония Таро Коноро ба ҳузур пазируфтанд.

Пас аз мулоқот бо Президенти Ҷумҳурии Тоҷикистон муҳтарам Эмомалӣ Раҳмон Вазири корҳои хориҷии Япония Таро Коно дар ҳузури хабарнигорон баён дошт, ки Япония дар чаҳорчӯбаи Муколамаи «Осиёи Марказӣ + Япония»  муносибатҳои дуҷонибаи дӯстонаро бо Тоҷикистон ва дигар кишварҳои Осиёи Марказӣ ҷонибдорӣ менамояд.

Таро Коно ҳамчунин   иброз дошт, ки ин аввалин сафари Вазири  корҳои хориҷии Япония ба  Тоҷикистон дар давоми 15 соли охир мебошад ва илова кард, ки «зимни мулоқот  бо Президенти Ҷумҳурии Тоҷикистон муҳтарам Эмомалӣ Раҳмон маҷмӯи масоили ҳамкории ду кишвар муҳокима шуданд.  Аз ҷумла, ҷалби сармоя ва сайёҳон аз Япония  ба Тоҷикистон, инчунин мубодилаи афкор дар соҳаи фарҳанг ва маориф. Япония бо Тоҷикистон муносибатҳои дӯстона дорад. Ҷиҳати  дар оянда тавсеа ёфтани  ҳамкории барои ҳар ду ҷониб судманд заминаи мусоид фароҳам оварда шудааст».