Барномаи «Дармон»-и Радиои «Ховар» ба Рӯзи байналмилалии мубориза бар зидди маводи нашъаовар бахшида мешавад

ДУШАНБЕ, 26.06.2019 /АМИТ «Ховар»/. 26 июн ҳамасола дар ҷаҳон Рӯзи байналмилалии мубориза бар зидди маводи нашъаовар таҷлил мегардад. Дар ин робита, дар барномаи «Дармон»-и Радиои «Ховар» масъалаи бемории нашъамандӣ, ки яке аз мушкилоти глобалӣ ба шумор рафта, он ба ҳаёти одамон ва солимии ҷомеа таҳдид мекунад, баррасӣ мешавад. Мусаллам аст, ки дар сурати ба роҳ намондани муборизаи беамон алайҳи ин раванди номатлуб, теъдоди истифодабарандагони маводи нашъаовар дар миёни аҳли башар рӯ ба афзоиш оварда, ҳаёти миллионҳо нафарро зери хатар мегузорад.

Имрӯз  дар Ҷумҳурии Тоҷикистон чӣ қадар одамон ба ин беморӣ гирифторанд? Аз ин беморӣ чӣ гуна бояд дурӣ ҷуст? Баҳри раҳоӣ аз он масъулин кадом тадбирҳои зарурӣ  меандешанд?

Мутахассисони соҳа ба  ин саволҳо  ва дигар масъалаҳои вобаста ба ин мавзӯъ дар барномаи мазкур ба  Шумо посух ва маълумот медиҳанд.

Барномаи «Дармон»-и Радиои «Ховар» имрӯз, 26 июни соли 2019, соати 10:30 ва такроран соатҳои  14:30 ва  20:30  пешниҳоди шунавандагон мегардад. Муҳаррир ва масъули барнома Нарзулло Ализода.