Дар Хатлон маводи доруворӣ ва молҳои тиббии муҳлати истифодашон гузаштаро нобуд карданд

ДУШАНБЕ, 21.06.2019 /АМИТ «Ховар»/.  6 ҳазору  688кг маводи доруворӣ, молҳои тиббӣ ва ороишию гигиенӣ, ки муҳлати истифодаашон гузашта ва бе сертификати мутобиқат  қарор доштанд,  нобуд карда шуданд. Дар ин бора аз Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба АМИТ «Ховар» хабар доданд. 

Бино ба иттилои манбаъ, ин иқдом  аз ҷониби мутахассисони Сарраёсати Хадамоти давлатии тандурустӣ ва ҳифзи иҷтимоии аҳолӣ дар вилояти Хатлон  анҷом дода шуд.

Тавре сардори шуъбаи назорати давлатии фаъолияти фармасевтии Сарраёсати Хадамоти давлатии тандурустӣ ва ҳифзи иҷтимоии аҳолӣ дар вилояти Хатлон Одина Шарифзода иттилоъ дод,    аз ҷамъи маводи сӯзонидашуда беш аз 70 фоизашонро ширкатҳои фармасевтии дар минтақа фаъолияткунанда, дар асоси мактуб барои несту нобуд кардан ба сарраёсат супоридаанд. Боқимондаи мавод дар рафти санҷишҳои мутахасисиони сарраёсат аз дорухонаҳо, нуқтаҳои доруфурӯшӣ ва муассисаҳои тандурустӣ аз муомилот  гирифта,  сӯзонида шудаанд.

Ба гуфтаи О.Шарифзода,  дар қиёс ба солҳои қаблӣ сатҳи масъулиятшиносии соҳибкорони соҳаи фармасевтӣ баланд мегардад. «Онҳо кӯшиш мекунанд,  ки маводи дорувории муҳлати истифодаашон гузаштаро сари вақт аз муомилот гирифта, барои несту нобуд намудан ба сарраёсат супоранд»,-афзуд ӯ.